Un viaxe pel tren más llargu del mundu

El fotógrafu francés Patrick Bard convídanos a un viaxe pel "tresiberianu"

na FNAC

Dende 1916, el Ferrocarril Tresiberianu empata Moscú con Pekín. La llinia de ferrocarril más llarga del mundu ye anguaño tamién una de les que van más despacio. Los 7.867 kilómetros que mide la llinia tarden en facese dalgo más de 6 díes, pasando per 990 estaciones. El fotógrafu francés Patrick Bard fizo esti viaxe cola cámara al pescuezu y ofrez na FNAC del Centru Comercial "Parque Principado" una esposición de 42 copies de primera categoría en que pue apreciase tola maraviya etnográfica y paisaxística qu'atraviesa'l recorríu del tren.

El mesmu Bard fala de la esperiencia del viaxe "Los comerciantes Mongoles engárrense por montar nos vagones cargaos con ropa y productos fechos en Turquía; falsificaciones d'Armani o de Nike qu'ellos mesmos venden nel tren por unos pocos rublos. El convoy echa a andar... el paisaxe de Rusia aparráu de calor o neváu nel fríu de la Siberia, apaez dende la ventana del tren como un decoráu de cine, y los retayos industriales de la gran Unión Soviética espárdense alredor de les ciudaes como un cobertor de ferruñu" Bard conclúi que'l tren siberianu fai xusta l'afirmación de Stevenson: "lo importante ye'l trayectu, non el destín".

La esposición "transiberiennes" va tar colgada de les parés de la FNAC hasta'l 18 d'ochobre