Un trabayu n’asturianu, ganador del Premiu “Rosario Acuña” pa estudiantes de secundaria

La VIII edición del Premiu d'investigación "Rosario Acuña" que convoca l'IES que lleva'l nome de la famosa escritora y pola Conseyería d'Educación y que ta empobináu a estudiantes de secundaria, bachilleratu y ciclos formativos foi pal trabayu "Lantroxu ayeri y güei" qu'ellaboraron un grupu de 17 alumnos del IES Doña Jimena de Xixón coordinaos pola so profesora de llatín Ana María Fernández y la de llingua asturiana Paz Fonticiella. El xuráu emponderó l'enfoque interdisciplinar, el que'l trabayu se ficiere coordinándolu dende asignatures distintes, l'emplegu de les nueves tecnoloxíes y l'usu de la bibliografía. Al actu d'entrega del premiu asistieron el Director Xeneral de Recursos Humanos José Arturo Verano y la conceyala d'Educación de Xixón Carmen Rúa.