Un total de 573 emigrantes votaron pola circunscripción occidental

La Xunta Eleutoral zarró la recepción de votos procedentes de la emigración. Pela circunscripción occidental, onde’l PSOE tovía tien opciones de ganar un escañu, llegaron un total de 573 papeletes. 2.863 emigrantes participaron nes eleiciones.
 
Ésta cifra ye menor que nes eleiciones anteriores, nes que se rexistraron 863 votos, de los que 500 foron pal PSOE y 49 pa Foro. Pa algamar l’escañu necesariu pa impedir el pautu de la derecha, los socialistes necesitaríen 177 votos más que’l so rival y, amás, sumar trés por caún que reciba’l partíu de Francisco Álvarez-Cascos. De mantenese la proporción del 2011, el PSOE ganaría un diputáu más pa sumar 17, mentes que Foro quedaríase con 12.
 
Otra manera, na circunscripción central recibiéronse 1.707 votos y na oriental, 583, pa sumar un total de 2.863 papeletes ente la emigración. Éstos llegaron toos per vía diplomática, a esceición de dalgo más de 300 votos que llegaron per corréu y que foron impugnaos por Foro de Ciudadanos. La Xunta Eleutoral diolos por válidos.