Un total de 25 ellaboradores van participar na XXIV Muestra de Quesos del Oriente d’Asturies

El domingu va celebrase en Llanes una edición nueva de la Muestra de Quesos del Oriente d’Asturies. Un total de 25 ellaboradores de delles variedaes van ufrir les sos creaciones a les persones que s’averen a la plaza de Santa Ana.
 
Asina, los llaniscos y la gran cantidá de turistes que tán estos díes pela zona van poder mercar quesos de les variedaes artesanes más representatives del oriente asturianu, como los de Beyos, Gamonéu, Pría, Cabrales, Vidiagu y Porrúa, ente otros. D’igual forma, tamién van instalase como complementu a la Muestra, na plaza de Cimavilla, esposiciones de productos agroalimentarios y artesanía.
 
La XXIV Muestra de Quesos del Oriente d’Asturies, entamada pol Conceyu de Llanes en collaboración col Gobiernu y Caxastur, va tar abierta al públicu de 10 a 14 hores, y de 17 a 20 hores. P’amenizar la xornada, ta prevista tamién l’actuación de la Banda Gaites Llacín.