Un sofitu tecnolóxicu perimportante pa Europa

El programa GALILEO -promovíu n'andecha pola Comisión Europea y pola Axencia Europea del Espaciu- tien como fin dotar a Europa d'una infraestructura global pa servicios de llocalización, navegación y sincronización vía satélite nel ámbitu civil. Actualmente mencionar esti tipu de funcionalidá ye falar del GPS (Global Positioning System). El GPS ye un sistema creau pol gobiernu de los Estaos Uníos d'América con fines militares, aunque cuenta con una señal civil gratuita, pero l'emplegu d'esta nun tá garantizáu, como quedó demostrao na guerra de l'antigua Yugoslavia. Énte esta situación y sabiendo que Rusia cuenta con un sistema propiu llamáu GLONASS -incompatible con GPS-, resulta claro la deficiencia que presenta Europa n'esti aspeutu tecnolóxicu.

De forma breve y ensin entrar munchu nel detalle téunicu, esti proyeutu van igualu 30 satélites (27 operativos y 3 en reserva), asitiaos n'orbites medies o MEO (Medium Earth Orbits)-, a una altura d'unos 24.000 kilómetros sobre la superficie terrestre. Diches órbites van ser circulares y van tener una inclinación de 55 a 60 graos col planu del Ecuador, lo que va da-yos una escelente cobertura hasta llatitúes de 75 graos Norte. Lóxicamente necesítase amás una infraestructura terrestre que controle los satélites y les señales de navegación qu'emitan. Nun entamu va tar constituyida por 14 estaciones de tierra, asitiaes nunos puntos estratéxicos del planeta, que van tomar los datos de los satélites y distribuyilos a traviés d'una rede propia a les instalaciones centrales de control.

Col llanzamientu del "Giove-A" desde'l cosmódromu de Baikonur, en Kazajistán, el pasáu 28 d'avientu, entamó la primera etapa d'esti perimportante sistema europeu per satélite, la fase esperimental. Darréu va venir la fase de validación, que va consistir nel unviu ente'l 2006 y el 2007, de cuatro satélites útiles -que ye'l númberu mínimu pa que'l sistema funcione y se puean realizar prebes-. La fase operativa colos 30 satélites cuenta con terminase nel 2010.

Hai que facer especial mención al fechu de que les autoridaes estadounidenses tuvieron intentando que'l programa fracasare. La Secretaría d'Estáu de Defensa Americana entamó una campaña contraria'l proyeutu col unviu de misives a miembros europeos de l'OTAN, amosando la so preocupación porque la señal xenerada nel sistema européu pudiere interferir les operaciones militares del GPS. A esto hai qu'amestar el mieu que xurdió nel país norteamericanu tres del 11de setiembre. Sicasí, l'esfarraple de les Torres Ximielgues punxo de manifiestu la necesidá que tien Europa de nun depender d'otros sistemes fuera del so control, aspeutu mui valoratible nel casu de conflictu bélicu.

Un tema importante, si se quieren facer bien les coses, ye que'l sistema tenga dende un principiu cobertura mundial. Nun se debiere de tratar tanto d'afayar una alternativa'l GPS sinon más bien complementalu, faciendo los dos sistemes compatibles -nun se vaya a cometer l'error que tuvieron los rusos con GLONASS-. Darréu'l sistema va a ser más modernu, más completu -tien un marxe d'error d'un metru- y va solucionar los problemes de les males cobertures en zones polares europees, por exemplu.

Quiciabes se trate d'un asuntu más políticu qu'económicu, pue ser, pero ensin dulda ye un doble sofitu pa Europa: unu económicu y otru tecnolóxicu. L'aspeutu tecnolóxicu ta claru; pero nun se pue dexar de llau que tá enrriba la mesa'l facese con una parte del mercáu de la navegación per satélite. Estudios previos demostraron que'l proyeutu ye rentable y que va afalar l'espoxigue de la economía europea. Posibilidaes de negociu hai infinites, lo que hai que facer ye saber esplotales. Por mencionar delles, les aplicaciones más básiques van dende'l tener controlaos los aviones que surquen los cielos, los barcos que naveguen pel océanu o, incluso, evitar que los participantes del París-Dakar se pierdan pel desiertu.

Otramiente, cuenta col compromisu de participación de países de fuera de la Unión Europea como pue ser China. El proyeutu ta valoráu en 3.800 millones de euros, dos terceres partes procedentes d'empreses privaes, entre elles delles españoles (AENA y Hispasat). El programa estímase que pueda quintuplicar beneficios en pocu tiempu al traviés de la parte del serviciu que nun seya gratuitu. GALILEO, nun lo escaezamos porque ye perimportante, naz con vocación d'usu civil, aunque naide descarte'l so emplegu militar, nun vayamos a ser hipócrites a estes altures.

Trátase d'un gran negociu estratéxicu, tecnolóxicu y económicu que l'Unión Europea nun pue dexar escapar. Dende'l mio puntu de vista, atropa toles condiciones pa demostranos a nosotros mesmos qu'Europa avanzó tecnolóxicamente nos últimos años y como muestres voi emplegar dellos botones: tenemos un llanzador espacial, l'Ariane; un avión comercial, L'Airbús; y un caza, l'Eurofighter que supunxo una revolución nel mercáu d'aviones de combate. Nengún foi un fracasu.