Un PIB eléctricu

Ta acabante de salir el boletín d'Hispalink sobre situación actual y perspectiva de les rexones d'España correspondiente al segundu semestre del 2001. Viendo los númberos qu'apurre, y anque reconoz que la producción enerxética menguó esti añu y va seguir perdiendo otru poco más l'añu qu'entra, nel informe rescampla que de tol Productu Interior Brutu d'Asturies, el 9,2% depende de la enerxía. Esti porcentaxe ye más del doble de la media estatal, que ye del 4,4%, y namás Galicia ye quien a arrimase (bien de lloñe) a estos númberos, con una tasa del 7,6%.

Asturies tamién perpasa la media estatal en construcción, un sector del que depende'l 10,2% de la economía asturiana cuando la media estatal ye del 8,5%. El sector de bienes d'equipu ye otru de los pegoyos de la economía astur, arramplando col 9,4% de la producción y tamién perriba de la media estatal, que queda nun 7,5%. Onde nun aguanta Asturies comparanza col estáu ye n'agricultura: 2,9% contra'l 4,6% de media. Los resultaos del boletín estatal puen completase colos del informe d'Hispalink Asturies, que tamién s'asoleyó estos díes.