Un mozu ye multáu pola Polícia Llocal d’Uviéu por llevar el distintivu ‘AS’ na matrícula del so coche

El coleutivu Sofitu dio l’anuncia del casu d’un mozu d’Uviéu que recibió una multa d’un Policía Llocal por llevar na matrícula del so coche’l distintivu ‘AS’ en sustitución de la ‘E’. Nel Parlament catalán hai un debate abiertu pol usu del ‘CAT’.
 
Según informen, la multa vieno tres dir a recoyer el coche al depósitu de la grúa d’Uviéu. Amás de los costes habituales pol treslláu del vehículu y la multa pol mal aparcamientu, el titular del coche recibió la sorpresa de que tamién multaben-y con 90 euros más por llevar el distintivu ‘AS’ na matrícula. Una sanción habitual ente los axentes de la Guardia Civil –de 200 euros, nesti casu–, pero que nun se diera hasta la fecha con miembros de la Policía Llocal. Conceyu Abiertu por Uviéu tamién solidarizóse con esti mozu y reclamó la posibilidá de que los asturianos pudieran llevar el distintivu ‘AS’ na matrícula en llugar de la ‘E’.
 
El debate de les matrícules ta anguaño d’actualidá, n’especial en Catalunya, onde’l Parlament va debatir en setiembre la posibilidá de permitir l’usu del distintivu ‘CAT’ nos sos coches. Esquerra Republicana de Catalunya (ERC) ye’l principal impulsor d’esta midida, apoyada por otros partíos nacionalistes, que tien el sofitu parcial del PSC y del PP. Estes dos formaciones apoyen la inclusión del ‘CAT’ nes matrícules siempre que nun tapen la ‘E’ y sía voluntario. Una postura similar defende’l Partíu Asturianista (PAS) col 'AS' n’Asturies.