Un llibru recupera la llucha de les obreres d'IKE

Ente 1984 y 1994 les trabayadores de la fábrica de camises IKE de Xixón llevaron alantre una de les batalles más llargues de la reconversión industrial asturiana. Engarraes políticos, xueces, la policía y les propies propies families d'elles, les emplegaes d'IKE, la fábrica de camises que garró'l nome de la visita d'Eisenhower a España, tuvieron diez años reclamándo-y a l'alministración una salida al pieslle de la empresa. El resultáu foi la derrota, pero nel trescursu de la llucha les muyeres d'IKE pasaron per una tresformación personal que-yos llevó de vivir n'apatía política a marcase ideolóxicamente y facer una protesta obrera ensin comparanza en cuantes que la protagonizaron namás que muyeres, que veníen amás de trabayar nun marcu de paternalismu nel que la empresa funcionaba como una gran familia na que'l movimientu sindical nun tenía influyencia. A lo llargo de diez años, les muyeres d'IKE punxeron on barricaes, ocuparon edificios públicos, tomaron al asaltu un barcu y echaron cuatro años trancaes na fábrica.

Una década dempués a protesta de les muyeres d'IKE garra perspectiva de socesu , y asina lo traten Carlos Prieto, Guillermo Rendueles, Carlos Muñiz y Rubén Vega, que tan acabantes d'espublizar "IKE. Retales de la reconversión " un llibru que recueye la memoria d'aquella esperiencia de resistencia y qu'analiza les consecuencies sociales y psicolóxiques dende una perspectiva que ve'l procesu d'IKE allumáu pol contestu del fin del trabayu estable. El llibru inclúi testimonios de les obreres d'IKE, un analís de l'actuación de los empresarios y los poderes públicos asturianos na crisis a cargu de Carlos Prieto, un estudiu dende'l puntu de vista siquiátricu de les consecuencies personales del procesu pol sicólogu Guillermo Rendueles y un relatu de les estratexes llegales que ficieron el colectivu d'obreres por Carlos Muñiz. El llibru remata con una entrevista col historiador Rubén Vega esplicando'l contestu económicu y políticu que taba alredor del conflictu d'IKE. El llibru edítalu l'Asociación Cultural madrileña "La dinamo".