Un llibru recueye la historia de los chigres-tienda

«Bares-tienda en Asturias» ye'l títulu del llibru acabante salir que recueye la historia de los últimos chigres-tienda, una modelu de negociu que, como'l so nome indica, amiesta les característiques propies d'un chigre cola so barra y meses con un espaciu acutáu pa tienda nel que podía mercase tolo preciso pa la casa, dende productos d'alimentación hasta xabón y deterxente o artículos de ferretería como puntes o torniellos. Venceyaos a la imaxe de pueblos y parroquies rurales de toa Asturies,los chigres-tienda tuvieron un papel mui importante a lo llargo del sieglu XX pero foron morriendo adulces mientres otros establecimientos como les grandes superficies diben garrándo-yos el so mercáu y la sociedá tradicional que paraba nellos diba desfaciéndose.

Sicasí, cerca de 300 d'estos establecimientos sobreviven anguaño n'Asturies. Anque la fiscalidá ta tamién poniendo otru clavu na caxa de los chigres-tienda, dellos conceyos como'l de Cangues d'Onís tienen aprobaes mengües nes tases fiscales a los chigres-tienda, anque ello nun ye abondo p'afitar la continuidá d'estos supervivientes, a los que-yos dedica David Fernández Moro esti llibru acabante d'asoleyar y que cuenta na parte gráfica coles semeyes del alemán Arnaud Spani Tellechea, al que'l públicu conoz de xuro polos sos trabayos pa la promoción turística de Xixón o Llanes.

David Fernández Moro, autor d'esti llibru, yá espublizare un anticipu d'esta obra nel númberu 16 de la revista Asturies, Memoria Encesa d'un País, qu'asoleya periódicamente la Fundación Belenos