Un llibru esmenuza la dinastía de los Rato

La editorial Plaza&Janés ta acabante d'espublizar "Los Rato" un llibru de Ramón Tijeras, periodista y profesor na Facultá de Ciencies de la Comunicación de la Universidá Rey Juan Carlos de Madrid nel que se-y pega un repás a la familia del actual ministru d'economía, dende los sos anicios como comerciantes n'Asturies hasta convertise nuna de les families más influyentes d'España en tiempu de Franco, cuando l'imperiu empresarial de los Rato albarcaba dende negocios mineros y industriales a grandes cadenes distribuidores d'alimentación y medios de comunicación.A la manera d'una novela, el llibru reconstrui los episodios más escuros de la dinastía, como cuando'l padre de Rodrigo, Ramón Rato Rodríguez San Pedro, acabó presu por evasión de capitales a Suiza y recibió l'indultu de manes del mesmu Franco. Esti episodiu val tamién pa que l'autor esponga la so teoría sobre por qué'l gobiernu del PP nun-y devolvió a Ruiz Mateos la espropiada Rumasa. Según Tijeras, ello foi por una venganza personal de Rato sobre Ruiz Mateos, que d'aquella aprovecho l'encarcelamientu de Ramón Rato pa facese con parte de los sos negocios.Yá en tiempu de democracia "Los Rato" esmenuza'l procesu de creación d'Onda Cero al partir de la xuntanza de les emisores de la ONCE cola Cadena Rato, resultando d'ello un magullu d'intereses creaos qu'enrieda lo mesmo a los socialistes entós nel poder qu'a la familia del actual vicepresidente. La investigación llega hasta'l momentu actual, en que l'autor espón les posibilidaes que tienen de rellacionase les empreses de la familia Rato cola alministración al través de delles persones de confianza del ministru y tamién les rellaciones que tien cola célebre sociedá Gescartera.Con too y con ello, el llibru nun recueye ún de los asuntos d'actualidá nos que se vio metida la familia Rato, a la que los xulgaos acaben d'amiestar un miembru más na persona de Rosario Blanco, una muyer que la xusticia acabó demostrando que yera descendiente d'Alfredo Figaredo, tíu del ministru.