Un llibru enfrenta a Astures con Romanos

Astures y romanos, frente a frente ye'l títulu del llibru acabante asopleyar col patrociniu de la Obra Social y Cultural de la Caxa d'Asturies y nel que los arqueólogos Jorge Camino, Yolanda Viniegra y Rogelio Estrada faen una reconstrucción del enfrentamientu ente l'imperiu romanu y los pueblos astures que tuvo por escenariu'l Castiil.lu La Carisa, el campamentu militar romanu asitiáu a mayor altura de toa Europa y un de los yacimientos arqueolóxicos que más tan dando que falar dende va unos años p'acá.

El castiil.lu de La Carisa, ente los conceyos d'Ayer y L.lena, asítiase a 1.700 metros sobre'l nivel del mar. El llibru ilustra la secuencia d'acontecimientos históricos qu'asocedieron nesti enclave militar allumáu polos afayos arqueolóxicos apaecíos nes últimes campañes d'escavación na redolada del Monte Curriel.los, esplicando como a últimos del sieglu I a.c. esti pasu foi l'escenariu de la última gran llucha ente astures y romanos, como demostraría l'apición de fortificaciones astures na redolada del campamentu romanu.

Amás del significáu históricu que tien al poder datar y esplicar el procesu d'entrada de Roma n'Asturies, el de La Carisa ye un yacimientu mui interesante dende'l puntu de vista de la historia bélica, sorrayando los arqueólogos el so valor como escenariu de batalla únicu n'Europa. Preba d'ello ye que pa facer la obra los autores contaron col asesoramientu d'un militar, el xeneral Francisco Ramos Oliver, quien sorrayó la importancia de que en La Carisa llucharon frente a frente dos bandos claramente organizaos, viéndose como los astures actuaron como un grupu unitariu contra l'invasor.

Ver más sobre La Carisa nesti artículu de la revista "Asturies, memoria encesa d'un país"