Un llibru en primer persona sobre la revolución del 34

El Presidente asturianu Vicente Álvarez Areces presentó ayeri na Selmana Negra de Xixón la edición de "hombres de octubre" estoyu d'artículos y escritos del xixonés Ignacio Lavilla nos que cuenta la intrahistoria de la revolución del 34. La edición de baldre, pagada pol Principáu y la Selmana Negra, escosóse na mesma tarde de la presentación.

Con prólogu de Paco Ignacio Taibo I, el llibru fai estoyu de los artículos qu'escribiere ente 1935 y 1936 Ignacio Lavilla contando en primer persona los socesosde la Revolución y qu'apaecieron en periódicos y revistes d'Asturies y del mundu entero. Los artículos foron un encargu d'Amador Fernández y Indalecio Prieto, que vieron la necesidá de que daquién contare en primer persona los socesos de la Revolución d'Asturies, cola intención de qu'aquellos artículos se convirtieren na "visión de los vencíos"

"El liberal" de Bilbao foi ún de los primeros periódicos en qu'apaecen les cróniques de Lavilla, que dempués se reproducen en "El socialista" de Madrid y lleguen a les páxines de periódicos belgues como "As", franceses como "Le Populaire" o norteamericanos como el "Daily Worker".

L'ésitu de les cróniques llevó a Ignacio Lavilla y Indalecio Prieto a pensar facer un llibru d'elles, pero l'entamu de la Guerra Civil dexó pa prau el proyectu.

Na presentacióndel volume, el Presidente Areces recordó dellos momentos del llibru, que, según reconoció, fai un recorríu dende l'enfotu que de mano se vive pola revolución hasta'l desencantu y la represión del final, incluyendo'l pasu del mesmu autor pela cárcele del cuartel de les Adoratrices.

El Presidente lleó una cita del llibru sobre'l 13 d'ochobre n'Uviéu na que Lavilla diz "pasé penriba l'escombru de les cases quemaes y entré, separtando calabres en delles cases vacies. Tuve tamién nel cementeriu. Había ellí una fila de trece individuos amarraos peles manes y pasados a machete; ente ellos un rapaz de trece o catorce años".

Setenta años dempués, el Gobiernu del Principáu d'Asturies y la Selmana Negra de Xixón recuperaron los artículos pa facer con ellos un intersantísimu llibru, "hombres de octubre". Bona pena ye que la edición, de tirada curtia y que, por compromisu de les dos partes, decidióse repartir de baldre, escosóse bien ceo, siendo yá mui dificil facese con un exemplar d'esti documentu históricu.