Un llibru de Xulio Viejo analiza la lliteratura medieval asturiana

"Llingua y cultura lliteraria na Edá Media Asturiano-lleonesa" ye'l títulu del volume acabante d'espublizar por Xulio Viejo na editorial Trabe. La obra fai un estudiu oprmenorizáu de tola lliteratura asturiana y llionesa dende l'aniciu del medievu hasta'l sieglu XIII y nel que s'enxerten toles fontes de documentos escritos, dende les que son d'aniciu lliterariu dafechu hasta los testos llegales como testamentos y donaciones o escritures de venta, pasando per cróniques históriques.

L'autor fai na obra un estudiu sobre la evolución de la llingua asturiana a partir del romance llatín y de cómo se va conformando l'autoconcencia llingüística dende finales del Medievu que va cuayar nel sieglu XVII col nacimientu de les lletres asturianes como les conocemos anguaño. Con ello, el pruyimientu del llibru consiste n'afondar en clave asturianista, na idea de que la cultura llatina na Edá Media nun ye daqué estremao dafechu de la cultura popular románica d'Europa, siendo quiparable a la de Lombardía o cualquier otra rexón europea

Xuan Busto Cortina, profesor de lliteratura na Facultá de Filoloxía, ye'l responsable d'esti gran proyectu que lleva funcionando dende 1998 y que ta acabante d'ofrecer el so primer resultáu. Xunta elli, los tamién profesores Xulio Viejo y Leopoldo Sánchez Torre lleven el llabor cola ayuda de los becarios Xose Nel Comba, Guadalupe Valdés, Ramiro González Delgado y Raquel Suárez.