Un llibru anónimu fai propaganda de les iniciatives del Gobiernu asturianu

Un llibru de más de 150 páxines editáu a color y en papel d'alta calidá ta llegando estos díes a les puertes y buzones de les viviendes asturianes. Editáu en delles versiones adaptaes a los conceyos d'Asturies onde va repartise, el llibru fai anuncia de los proyectos y iniciatives del Gobiernu asturianu a lo llargo de la presente llexislatura baxo'l títulu "Construyendo Asturies. Una visión rexonal del sieglu XXI".

La obra, que da esplicaciones en términos optimistes y allabanciosos sobre toles obres y iniciatives del Gobiernu asturianu, dende les mayores hasta les más pequeñes, entamando pela ampliación del Puertu d'El Musel y llegando hasta la informatización de la taquiella del Teatru Xovellanos, inclúi los testemuños de profesionales y xente rellacionao con cada iniciativa que s'anuncia nel llibru. Dase'l casu de que delles persones qu'apaecen nel llibru denunciaron que naide-yos pidiere permisu pa ello y que les declaraciones que-yos reproducen na obra tan descontestualizaes y garraes d'otres fontes, estractándose d'entrevistes y declaraciones a periódicos feches endin rellación con esta obra, según supo Asturies.com.

El llibru nun lu edita nenguna entidá oficial nin l'executivu asturianu, siendo la única referencia a l'autoría del mesmu la de la empresa "Avenida Gráfica S. A." Asitiada en Leganés (Madrid). Xunta esta referencia, el llibtu namás inclúi una "nota del editor" ensin firma nin identificación y que agradez a toles persones, empreses y instituciones que ficieron posible'l llibru la so ayuda, al empar que-yos agradez el so sofitu a los anunciantes, ente los que s'alcuentren les principales empreses de construcción que lleven alantre obra civil n'Asturies, el so sofitu económicu.

El repartu d'esta misteriosa obra ensin autor y que'l Gobiernu asturianu negó que ficiere o encargare llevantó les crítiques de fuerces polítiques ayenes al Gobiernu de tol arcu políticu. Asina, el diputáu asturianu del PP Joaquín Aréstegui calificó la obra de "publicidá encubierta y ellaborada por xente que trabaya en gabinetes de prensa del Principáu".

Pela so parte, Izquierda Asturiana (IAS) calificó al traviés de declaraciones del so representante en Xixón Pablo Rodríguez de "descarada campaña d'agit - prop socialista" la publicación, asegurando que "los responsables del executivu asturianu quieren que paeza una iniciativa filantrópica d'un editor madrileñu" dalgo que "Naide pue creer cuando la publicación vien amás acompañada de les declaraciones optimistes de conceyales y de la mismísima alcaldesa de Xixón" polo que "rescampla que los nuestros gobernantes tán escondiendo l'auténticu orixe de la publicación" que calificó de "estafa escandalosa".