Un intensu programa d’actos pa celebrar los 30 años de Conceyu Bable

La selmana del 20 al 27 de payares va celebrase n'Asturies el 30 aniversariu de l'apaición de Conceyu Bable, colectivu del que guañó l'actual movimientu de recuperación de la cyltura asturiana.

En payares de 1974 la dictadura de Franco entovía tenía cuerda pa tirar otru añu más, pero publicaciones como la revista "Asturias Semanal" convertíense nun de los espeyos mediáticos del surdimientu d'una nueva sociedá plural y democrática. Esi mesmu mes, "Asturias Semanal" estrenaba una nueva sección entitulada "Conceyu Bable" escrita dafechu n'asturianu que taba al cargu de trés persones, el filólogu Xosé Lluis García Arias, el filósofu Lluis Xabel Álvarez y el profesor de lliteratura Xuan Xosé Sánchez Vicente. L'ésitu de la sección, na que bien pronto entamaron a collaborar más persones, bien d'elles dende fuera d'Asturies, demostró que "Conceyu Bable" yera más qu'una sección dientro d'una revista, constituyéndose nel 1975 como una asociación cultural llegalizada. De les sos campañes y propuestes derívase col tiempu tolo qu'anguaño se conoz como asturianismu con toles sos variantes, y de lo que nun cabe dulda nenguna ye de que Conceyu Bable, que llegó a contar los sos socios por miles, foi ún de los movimientos sociales más importantes nel últimu cuartu del sieglu XX n'Asturies.

30 años dempués, un bon garapiellu de persones y colectivos vinculaos al facer de Conceyu Bable tienen preparáu un programa d'actos conmemorativos que va desarrollase del 20 al 27 de payares con acontecimientos per bien de conceyos asturianos. El programa va entamar el 20 de payares con una misa en llingua asturiana nel Cristu les Cadenes d'Uviéu a cargu de miembros del colectivu Manuel Fernández de Castro, mientres que'l día 22 van facese nel Entregu un conciertu de canción asturiana y un homenaxe al grupu "Camaretá", el primer esponente musical del surdimientu. El día 23, Carlos Rubiera, otru de los primeros cantantes n'asturianu d'aquel tiempu, va facer un conciertu nel Palaciu Revillaxixéu de Xixón, mientres que'l miércoles 24 va ser únde los actos centrales del programa con un conciertu de cantautores asturianos y un actu de reconocimientu a los fundadores de C.B.

El programa sigue'l xueves 25 con un coloquiu colos pioneros de Conceyu Bable nel Atenéu Obreru de Xixón pal que nun se sabe entovía quien van ser los asistentes, siendo conocida la rocea qu'esiste dende va años ente García Arias y Sánchez Vicente, mientres que los dos últimos díes van dedicase a les actuaciones musicales, el vienres de folk nel Parque Xovellanos de Mieres con La Bandina'l Tombo, Deua Dubra y Skanda y el sábadu tamién en Mieres pero con grupos de rock nun conciertu pal que tan previstos Skama la Rede y La Tarrancha.

Los actos d'esti XXX aniversariu de Conceyu Bable tamién van treslladase esti día 27 hasta Llanes, onde va tar celebrándose la Xunta d'Escritores Asturianos. Ellí va tar l'académicu Xosé Bolado, que va pronunciar la conferencia "Lliteratura y Identidá Asturiana".