Un informe del CSIC diz que les sondes del “Héspérides” dañaron a los calamares xigantes nel 2003

En setiembre del 2003 apaecieron na costa asturiana una gran cantidá de cefalópodos xigantes muertos. La muerte de trés calamares xigantes d'ente 68 y 140 kilos nel plazu d'una selmana rellacionóse d'aquella cola actividá del "Hespérides" el buque oceanográficu de l'Armada que tuvo neses mesmes feches pela costa asturiana faciendo esploraciones. Daquella, el responsable del Centru pal Estudiu y Protección de les Especies Marines, Luis Laria, denunció énte los medios de comunicación que les sondes del barcu investigador yeren les responsables directes de la muerte de los cefalópodos y tamién de les d'otres especies que nun s'evaluaron. La tesis del científicu del CEPESMA teníase en que l'unviu masivu d'ondes dende'l barcu provocaba cambeos de presión qu'alloriaben a los calamares xigantes, morriendo estos al xubir a flote y sufrir una fuerte descompresión. Los aparatos del Hespérides, nomaos "skrimers" o "skrakers" facíen españar unes burbuxes d'aire comprimío, rebotando la onda espansiva en fondu la mar y devolviéndo-yla al barcu, que sacaba asina mapes del fondu marinu. Daquella, Laria denunció tamién que la investigación del barcu tenía intereses comerciales aparte de los científicos, rellacionando la presencia de la nave cola investigación de depósitos de gas y de petroleu na costa asturiana.

Poques selmanes dempués de conocese estos fechos, la organización política Andecha Astur presentó nel Xulgáu d'Instrucción de 1ª Instancia de Villaviciosa una denuncia na que pidía que se comprobare la rellación ente les actividaes del buque "Hespérides" y la muerte de de los calamares D'alcuerdu colos datos científicos que se conocíen, Andecha Astur defendía na denuncia que taba cometiéndose un delitu escontra los recursos naturales y el mediuambiente castigáu nel artículu 325 del Códigu Penal con penes. La denuncia d'Andecha Astur almitíose a trámite nel so momentu, pero un añu dempués, en payares de 2004, un autu del Ministeriu Fiscal decretó'l sobreseimientu provisional de les actuaciones y l'archivu de la denuncia por "nun poder acreditar un riesgu grave pal equilibriu del mediuambiente, colo que nun apaez debidamente xustificada la fechura del delitu" anque l'autu dába-yos relevancia a a los datos de les necropsies de los calamares.

Según esplica Andecha Astur, coincidiendo col periodu d'apelación del autu en que se dexaba la denuncia pa prau, el Centru Superior d'Investigaciones Científiques (CSIC) asoleyó un informe que llegó a asoleyase na prensa y nel que se confirmaba que los sondeos del buque "Hespérides" mataron a los calamares xigantes en 2003. A la lluz de los datos del estudiu del CSIC, Andecha ta acabante d'apelar y solicitar la reapertura del casu.