Un informe de la XDLA detalla los incumplimientos en materia toponímica na rede ferroviaria

|
Llinia C-8f de FEVE nel ‘Informe sobre l’incumplimientu de la toponimia oficial na rede de ferrocarr

Los responsables d’ADIF y RENFE, amás de dellos departamentos del Gobiernu, yá tienen enriba la mesa un ‘Informe sobre l’incumplimientu de la toponimia oficial na rede de ferrocarril d’Asturies’ asoleyáu pola Xunta pola Defensa de la Llingua Asturiana (XDLA). Esti coleutivu recuerda la importancia que tien el so usu y la illegalidá que supón qu’un organismu públicu nun la emplegue.

El documentu analiza los nomes oficiales de les 207 estaciones de ferrocarril asturianes “y cómo ADIF – empresa pública estatal alministradora de la rede– , RENFE –empresa pública estatal esplotadora de la rede– y CTA –Consorciu de Tresportes d’Asturies, entidá dependiente del Gobiernu d’Asturies--, nun respeten la llegalidá toponímica”. Magar la claridá llegal, la toponimia oficial d’Asturies “incúmplese sistemáticamente nos avisos sonoros de los trenes, nes señales d’andenes y estaciones, nos cartelos y paneles d’horarios y nes redes sociales, páxines webs y aplicaciones móviles de RENFE, ADIF y CTA”, esplica la XDLA.

El testu rescampla que “el cumplimientu rigurosu de la toponimia oficial nel tresporte ferroviariu diba ser mui positivu nel ámbitu de la normalización, amás de poner remediu a una situación bramente inesplicable: qu’un organismu oficial nun respeta la llegalidá”. La organización cívica pide aconceyamientos colos responsables d’ADIF y RENFE, la viceconseyería d'Infraestructures, Movilidá y Territoriu y la Conseyería de Cultura, Política Llingüística y Turismu, a los qu’unvió l’informe, pa falar sobre’l mesmu y “conocer les midíes que se van tomar pa solucionar una situación que nun pue allargase más nel tiempu, más tovía depués de conocer que la intención del Executivu asturianu ye rematar el procesu d'oficialización de la toponimia tradicional enantes d’acabar el 2022”.

La reclamación de que s'use la toponimia oficial ye una reivindicación vieya de la XDLA, tanto en campañes como en presentación d'escritos y quexes a entidaes privaes y públiques. “Ye inaceptable que nun Estáu de derechu los organismos públicos nun respeten a sabiendes la llegalidá”, sentencia.

Na imaxe, llinia de FEVE iguada pola XDLA nel informe cola toponimia correuta.

Contador Estadistiques