Un informe conseña la xuba de superficie tomao por autopistes n'Asturies

L'observatoriu de la Sostenibilidá del Ministeriu de Mediu Ambiente asoleyó estos díes un estudiu nel qu'analiza la evolución de los usos del suelu nel periodu 1987-2000. No tocante a Asturies, ún de los datos más importantes del estudiu ye que nesi periodu convirtiéronse n'autovíes un total de 728 hectárees, una xuba del 65% y que llevó a qu'Asturies tuviere nesa fecha 1.852 hectárees de suelu tomaes por víes circulatories de gran capacidá.

Otros datos del informe sorrayen como les zones urbanes representen el 43% de tola superficie artificial asturiana, mientres que los espacios comerciales y industriales faen otru 24%, anque la xuba más espectacular nos 13 años que toma l'analís foi la que sufrieron los vertederos y les escombreres que pasaron de tomar 472 hectárees a 1.319, conseñándose tamién una xuba grande de la esplotación minera a cielu abiertu

L'informe, que pue consultase na rede, conseña que la mayor parte de la superficie d'Asturies ta tomada de biesca que representa ente toles espoecies forestales el 69,8% de la superficie, una de les tases más altes del estáu, anque tamién s'alvierte del impactu sobre estes superficies de los incendios de los años 90. La tierra d'aprovechamientu agrícola supón el 27,9% de la superficie d'Asturies, siendo lo más d'ello praos pa ganadería.