Un gol de Djuka nel tramu final cambia’l guión de los derbis últimos

Uviéu y Sporting empataron 1-1 nel primer derbi de la temporada, partíu que paecía encamináu a finar como los 3 anteriores. Siguen los xixoneses ensin ganar al eternu rival nel Tartiere nesta etapa en Segunda División, pero salven un puntu gracies a un pase maxistral de Villalba a Djuka que-yos permite caltener el puestu d’ascensu direutu.

Paecía la mesma película de siempre. Un bon gol de Lucas, llibre de marca, al rematar col interior un centro bombiáu de Borja Sánchez adelantaba al Uviéu nel minutu 29 depués d’un arranque prometedor del Sporting qu’al cuartu d’hora los de Ziganda supieron frenar.

Nun llegaría la reación roxiblanca hasta’l descansu. Salieron los de Gallego con más ambición, pero ensin crear peligru real a Femenías, y los minutos pasaben pa celebración de la hinchada llocal.

La entrada de Bertín nel minutu 59 en sustitución de Campuzano p’asitiar nel centru a Villalba resultaría clave nel devenir del partíu, qu’empezó a desnivelase del llau xixonés énte un rival al que Ziganda mandaba p’atrás. Sería’l valencianu’l que nel 83 inventaba un pase en llargu a Djuka, que, énte la salida del porteru, picaba’l balón.

1-1 y aliviu pa los siguidores del Sporting, que yá víen una derrota nueva n’otru derbi depués de ver al Uviéu adelantase nel marcador. La conexón ente Villalba y el goliador serbiu camudaba’l guión de la película, que va tener segunda parte na xornada 36, la fin de selmana del 17 d’abril, con El Molinón como escenariu.

Na semeya, un ataque del Uviéu énte la portería defendida por Mariño.