Un fallu del equipu dexa a Alonso fuera de los puntos

Renault firmó un fin de selmana prietu nel Gran premiu deFórmula 1 d'Inglaterra. Col accidente de Jarno Trulli a 250 kilómetros por hora y el fallu d'estratexa en calcular la entrada a box de Fernando Alonso, la escuadra francesa tornó pa casa ensin marcar puntos en Silverstone.

De nada nun valió'l llabor de Fernando Alonso xubiendo puestos tola carrera. El pilotu asturianu, que salía na 15ª plaza, ganó dos puestos yá namás prender el semáforu verde, adelantando un coche trés d'otru hasta mangase na novena plaza y con posibilidaes de ponese sestu o quintu, pero l'accidente de Jarno Trulli tracamundió tolos planes de Renault. Tolos coches aprovecharon l'intre pa metese a cambiar cubiertes y poner gasolina, toos menos el Renault d'Alonso. Pa cuando se decataron d'ello y lu metieron a boxes, el coche de seguranza tenía tomada la pista y Alonso volvió a la carrera na 16º posición, entamando otra remontada que lu dexó na 10ª plaza final, ello ye, xusto fuera de la zona de puntos.

De tener más picardía en Renault, Alonso pudiere terminar incluso nel podiu, un error que reconoció l'equipu n'acabando la carrera.

Per delantre, Michael Schumacher ganó otra carrera (y van diez d'once con esta), anque esta vegada tuvo enfrente a Kimi Raikonen. El finlandés, con un Mclaren Mercedes vueltu a los puestos de cabeza, foi l'únicu en da-y guerra al alemán, mandando la carrera hasta la primer parada en boxes y metiéndo-y el focicu al Ferrari dempués del accidente de Trulli, qu'axuntó al pelotón nuna vuelta neutralizada pa retirar les pieces del coche del italianu qu'estraben la pista. Sicasí, l'entretenimientu acabó ehí, firmando Schumacher un trunfu fácil sobre'l Mclaren y con Barrichello pesllando'l podiu. Cuartu foi Jenson Button, el tercer clasificáu en mundial y que sigue perdiendo terrén na xeneral col alemán (53 puntos contra 100).