Un estudiu niega que faiga falta la llinia Lada - Velilla

Nun hai razones económiques que xustifiquen la construcción de la llinia d'alta tensión ente Asturies y Palencia. Esta ye la conclusión del estudiu que firmen los profesores universitarios Julio Lago y José Luis Caso y nel qu'entornen tolos argumentos de la industria eléctrica y les alministraciones pa la construcción de la llinia de 400kv.

L'estudiu presentóse nun actu públicu entamáu pola asociación Bodón, la Unión de Conceyos pa la Defensa y el Desarrollu de la Montaña Central Leonesa y la Plataforma pa la Defensa de la Cordelera Cantábrica. La idea central que defenden los autores del estudiu ye que nel estáu español yá hai una capacidá de producción que ta un 70% penriba de la demanda de corriente, polo qu'esta producción que nun s'aprovecha nel mercáu español trespásase a Francia. D'otra manera, los autores del estudiu afirmen que la rede de tendíos d'alta tensión actuales garanticen el suministru eléctricu ensin falta d'asitiar más filos d'alta tensión.

Ún de los autores del estudiu, el profesor asturianu de microbioloxía José Luis Caso, sorrayó que la llinia tien como principal xustificación el tresportar los kilowatios producíos n'Asturies, onde aseguró que se pretende multiplicar "innecesariamente" por cuatro la potencia de producción, llevándola hasta los 10.000 megawatios partiendo de los cerca de 2.500 actuales.

Pela so parte, el profesor lleonés d'económiques Julio Lago dixo que nun ye asumible económicamente pa los conceyos y paisaxes que va atravesar la llinia la presencia de torretes de 60 metros d'altor cada 400 metros de distancia a lo llargo de 120 kilómetros. Al paecer de Lago, la llinia pue resultar ruinosa pa conceyos que lleven años pasando por una crisis económica y demográfica y de la que tan saliendo en parte gracies al apueste pol desarrollu sostenible y polos recursos naturales.