Un estudiu indica que’l 80 por cientu de los consumidores asturianos compraría productu ecolóxicu

El 80 por cientu de los asturianos compraría productu ecolóxicu y el 87 por cientu taría dispuestu a esixilos nos sos comercios habituales. Son los datos d’un estudiu fechu pola Unión de Consumidores d’Asturies (UCE) xunto con Mediu Rural.
 
Según los datos ofrecíos pol presidente de los consumidores asturianos, Dacio Alonso, que taba acompañáu pol conseyeru, Aurelio Martín, casi la metá de les persones encuestaes, un 45,3 por cientu, afirmó mercalos nos últimos doce meses, frente al 54,7 por cientu que dicía que non. D'estos últimos, el 36 por cientu plantegaba como principal torga que son caros, el 25,4 por cientu que nun tien vezu, y el 21, por cientu afirmaba que son difíciles d'atopar. Amás, un 78,6 por cientu dicía nun saber ónde los venden, y más d'un 95 por cientu considerábase mui poco, poco o regular informaos.
 
Sobre’l preciu altu d’estos productos, Martín destacó “l'esfuerzu na cadena de producción” que conlleven esti tipu d'alimentos, motivu pol qu'él nun los considera “caros”. Al so xuiciu, los alimentos ecolóxicos “son un valor añadíu, un elementu estratéxicu y una alternativa pal mundu rural asturianu”. Tamién recordó que contribúin al caltenimientu del paisaxe natural, otru activu que xenera riqueza. Por último, el conseyeru apuntó na necesidá d’aumentar el consumu a nivel nacional y estatal, desafíu actual pa los productores d’ecolóxicu.