Un estudiu cuestiona’l celtismu n’Asturies

La editorial gallega Toxosoutos ta acabante d'asoleyar dientro de la colección "Keltia" el llibru "Astures y asturianos - Historiografía de la Edad del Hierro en Asturias" obra del arqueólogu catalán Carlos Marín Suárez (Barcelona 1978). El llibru parte d'un trabayu de doctoráu del autor pa la Universidá complutense de Madrid sobre la historiografía de la edá del fierru n'Asturies, faciendo un paralelismu ente esta y la percepción que la sociedá asturiana tien de la so historia antigua.

La obra de Carlos Marín parte de la denuncia d'un mitu de la vixencia de la cultura y herencia celtes n'Asturies que defende de la importancia d'esta nel pasáu y configuración d'una Asturies celta prerromana, una teoría que la investigación científica tendría desmontada dende va dellos años, según l'autor. Pa Carlos Marín, esiste una construcción del discursu d'una presencia celta, qu'entama a crease yá dende los primeros afayos arqueolóxicos de castros asturianos a últimos del sieglu XIX y qu'acaba de cuayar al traviés de los trabayos del CSIC y del IDEA en tiempu de la dictadura de Franco, que crearon una imaxe de los celtes con intereses ideolóxicos mui venceyaos a los del réxime. Cola llegada de la democracia y la creación de les modernes autonomíes Carlos Marín atopa que se da un doble xiru na investigación arqueolóxica, que per una parte llenda al ámbitu xeográficu de la comunidá autónoma los estudios sobre los castros pero que d'otra parte cuestiona cada vegada más l'aplicación del términu celta pa referise a esi periodu prerromanu.

Siempre según la tesis que desarrolla Carlos Marín nel so llibru, al empar que se da esa desmitificación del paradigma de lo celta por parte de l'arqueoloxía, créase dende los años 70 un movimientu d'identificación con esi paradigma por parte de gran parte de la sociedá asturiana y de distintes corrientes sociopolítiques, un fenómenu que Marín rellaciona cola falta de referentes culturales y identitarios d'una parte de los asturianos nun momentu en qu'hai una gran crisis industrial, adoptándose'l paradigma de lo celta en cuenta d'otros discursos identitarios posibles nesi momentu. Asina, anque yá'l primer rexonalismu astur d'enantes de la Guerra Civil aprovechó'l discursu celtista, va ser según Carlos Marín el nacionalismu asturianu dende los años 70 del sieglu XX el que se tenga nel discursu celtista como ún de los sos pegoyos básicos, acusando l'autor a les corrientes polítiques asturianistes y a movimientos culturales tres de los que l'autor ve intenciones polítiques, de remanar la historia pa que sirva a los sos intereses, ello arriendes de la conversión del paradigma celta nuna etiqueta cola que se marquen productos de mercáu como la que se conoz como música celta, na que pal autor pesen más conceptos de mercadotecnia que de recuperación de la música tradicional.

"Astures y asturianos - Historiografía de la Edad del Hierro en Asturias" yá ta a la venta n'Asturshop