Un empresariu d’Alicante quier mercar el Real Uviéu

L'empresariu alicantín de la construcción Francisco Gómez quier participar n'ampliación de capital del Real Uviéu SAD, anque la so condición pa entrar na operación ye que puea facese col 51% del históricu club uvieín, actualmente empozáu na clasificación de la segunda división B. La noticia adelantóla'l diariu uvieín "La Nueva España".

Francisco Gómez, de 50 años, ye ún de los empresarios de la construcción de carrera más espectacular. Dempués d'entamar trabayando na construcción d'encofrador "El Paloma" como se-y conoz pol nomatu, desarrolla actuaciones inmobiliaries en tola península, delles polémiques como la de Navas del Mar (Ávila) onde l'ayuntamientu mandó aparar les obres que taba entamando la empresa de Gómez pa facer una ciudá del golf con viviendes, esfarraplando pa ello un pinar reconocíu como monumentu natural por ser abellugu de cigüeñes y que l'empresariu mercare por 10 millones d'euros. Amás del sector de la construcción, Francisco Gómez tien rellación col mundu del fútbol, presidiendo entidaes como l'Orihuela, Toledo o Cartagena.