Un documental recuerda les movilizaciones de los trabayadores de les mines de Figareo

Entituláu 'Mines de Figareo. Memoria d'una llucha (1978-1980)', cuenta dos años d'aiciones en defensa de los emplegos y el futuru de la esplotación de la cuenca'l Caudal.

Nos primeros meses del añu 1978 entamen les movilizaciones na empresa de la familia Figaredo pola amenaza de pieslle énte la falta d'inversión na esplotación. Los trabayadores empiecen una llucha que se va allargar dos años, hasta'l 1980, cuando algamen la nacionalización de la empresa.

Esti tiempu ye'l que recuerda esti documental dirixíu por Alberto Vázquez García, una cinta de 100 minutos de llargor con testimonios de trabayadores de les mines de Figareo y vecinos na que collaboró la veterana asociación cultural antifranquista Amigos de Mieres. En tola cuenca del Caudal ye entá bien recordada, ente otres aiciones, la retención del patrón José María Figaredo, güelu del actual diputau de VOX nel Congresu por Asturies, con mesmu nome, y primu de Rodrigo Rato, por cuatro miembros de Comisiones Obreres per diez hores a lo alto del castillete.

Campaña de micromecenlagu na rede

Dada la situación pola crisis sanitaria pola pandemia de COVID-19, 'Mines de Figareo. Memoria d'una llucha (1978-1980)' nun pudo presentase, entamando una campaña de micromecenalgu na rede al traviés de la plataforma Verkami pa financiase. Ésta ta siendo un ésitu, con 1.216 euros recaudaos hasta'l momentu, superando en 316 la cantidá fixada pa la edición del DVD.

La xente interesao tien hasta'l domingu pela mañana pa mercar una copia y collaborar col proyeutu.

Mines de Figareo. Trailer alternativu from Alberto Vázquez on Vimeo.