Un documental pa “dexar afitada la importancia de Conceyu Bable”

L'audiovisual, proyeutáu na inauguración de la XLV Selmana de les Lletres Asturies, va emitilu tamién TPA. Éstos son los entrevistaos y l'horariu d'esta cinta d'homenaxe.

'Conceyu Bable: entamar los llabores de la casa' ye'l nome del documental d'esta edición, dedicada nesta ocasión a esti coleutivu nel cincuentenu aniversariu de la so fundación. Goxe Producciones encargóse de la so ellaboración, trabayu que fixeron a comuña Xune Elipe, Javi Lueje y Rubén Arena.

L'espectador va poder conocer la historia de Conceyu Bable al traviés de les persones que lu conformaron, asina como la so visión actual del idioma y el so futuru. Dan el so testimoniu frente a la cámara Miguel Solis Santos, Pilar Fidalgo, Xosé Lluis García Arias, Carlos Rubiera, Amelia Valcarcel, Xuan Xosé Sánchez Vicente, Vicente García Oliva, Lluis Xabel Álvarez y Ana María Cano.

"Esti documental quier dexar afitada la importancia del colectivu Conceyu Bable, al que se-y homenaxa nesta Selmana de les Lletres", apuntó enantes de la so proyeición Elipe. "Conceyu Bable tenía trés cabeces, Arias, Texuca y el Roxu, pero en realidá tenía munches otros. Y foron aquellos homes y muyeres, mui mozos, mui moces, quien a entamar un movimientu inéditu, orixinal, nuevu, y sobre manera esperanzador pal futuru del país. El futuru del país ye güei que tamos festexando de manera oficial los 50 años de Conceyu Bable", aseguró.

La emisión del documental, de cuasi una hora de llargor, va tener llugar mañana a les 22.31 hores en TPA.