Selmana de les Lletres Asturianes

Un discu-llibru con versión dixital n’asturianu rescata la figura de Berto Turulla

|
Cubierta interior llibru Berto Turulla

El Taller de Músicos de Xixón ta acabante d’asoleyar el llibru-CD-DVD ‘Berto Turulla. Una mirada moderna a la música popular d’Asturies’, con versión dixital n’asturianu. Esta espublización recupera la memoria del músicu que participó nel entamu del Nuevu Canciu Astur y que foi miembru de grupos como La Turulla o Cuélebre.

Un 4 d’abril del 1983 la música asturiana perdía a ún de los sos meyores esponentes. Finaba a los 26 años electrocutáu nuna actuación en Llaniu con Cuélebre el xixonés Alberto Martínez Berciano, conocíu popularmente como Bertu Turulla pol so pasu pol grupu de mesmu nome.

La desgracia causó un gran impautu y nun tardaron n’entamase numberosos homenaxes, ente ellos el recordáu d’El Molinón, el primer conciertu qu’acoyía’l campu de fútbol. Acudieron cerca de 50.000 persones, que pudieron ver nel escenariu montáu nel fondu norte a Miguel Ríos, Víctor Manuel, Nuberu y Carlos Rubiera, ente otros artistes y formaciones.

Cuasi 40 años depués, la figura d’esti músicu pioneru y renovador de la música asturiana dende la tradición, protagoniza la segunda espublización de la coleición René de Coupard, cola que’l Taller de Músicos quier rescatar personalidaes del patrimoniu musical asturianu y xixonés, en particular. Nel 2019 inauguróla’l llibru-CD ‘Trés mises de gaita. Ente la tradición y la conservación del patrimoniu asturianu’, tamién con versión dixital n’asturianu.

Eduardo García Salueña ye’l responsable del testu que cuenta, con munchu detalle, la trayeutoria musical como teclista mayormente y guitarrista, asina como arreglista, de Berto Turulla dende la so primer grabación profesional: el cenciellu ‘Aquella palombina/Les campanes del alba’ de Carlos Rubiera, nel branu del 1976, cantante referente del Nuevu Canciu Astur. La creación esi mesmu añu de La Turulla, con un repertoriu nel qu’entraba “mesmo la salsa como la ‘música celta’ que ta naciendo”, que se presentó na I Andecha Musical celebrada’l 14 de xineru del 1978 na Llaboral col de La Calzada acompañando tamién a Rubiera, Julio Ramos o Manolín ‘el nietu Celo Xuan’; el so pasu per Nuberu (1978-1979); la grabación de ‘Esparabanes’ (1980) con Ramos; les actuaciones coles orquestes de baille Azul Caribe o Latin Show; y la so incorporación nel 1981 al históricu grupu Cuélebre, asina como la so collaboración con iniciatives culturales y el movimientu obreru, rescamplen nesti llibru n’alcordanza del primer rockeru en contar con una cai en Xixón.

La espublización acompáñase d’un CD, con postproducción y masterización a cargu de Fernando Oyágüez, qu’inclúi grabaciones, dalgunes inédites, nos que participó Berto xunto con Carlos Rubiera, La Turulla y Latin Show –amás d’una versión de Also sprach Zarathustra (2001)’, procedente de las sesiones de grabación del cenciellu de Carlos Rubiera–, y d’un DVD ellaboráu por Javier Lueje col documental ‘Berto Turulla (1957-1963)’, dirixíu pol so hermanu Roberto, y interesantes conteníos estra como una entrevista a Nuberu a TVE nel 1978 na pista de La Esposición d’Avilés o una pieza musical de Senogul con semeyes sobre’l músicu entitulada ‘Dexái al cuélebre dormir’, ente otros.

De baldre

Esti cuidáu trabayu, al igual que’l primeru dedicáu a les mises de gaita, repártese de baldre na so versión física, editada en castellanu. La xente interesao ha d’escribir a la direición de corréu electrónicu tallerdemusicos.fmc@gijon.es y, tres la confirmación de disponibilidá –sólo se pue pidir un exemplar por persona–, recoyelu depués na entrada del Centru de Cultura Antiguu Institutu.

Les persones que residan fuera tamién pueden facelo pela mesma vía, anque nesti casu han d’abonar los gatos d’unvíu. Pa consultar el llibru n’asturianu na so versión dixital, calque nesti enllaz.

Contador Estadistiques