Día del Llibru Asturianu

Un Día d’Asturies con mázcara

|
Una Día d’Asturies con mázcara

Esti 8 de setiembre, Día d’Asturies, como vien asocediendo con toles celebraciones d’estos últimos meses, va tar marcáu pola pandemia. El Gobiernu nun entrega les sos medayes esti añu nin fai celebración oficial, entamando sólo un actu d’homenaxe a los sobrevivientes de la COVID; en Cuadonga nun va haber procesión de la Santina; y Xixón acueye una manifestación que reclama “soberanía y República” con tolos protocolos de seguranza.

Ye’l Día d’Asturies más estrañu que se recuerda dende’l 1984, añu nel que s’instituyó’l 8 de setiembre pa celebrar esta xornada en detrimentu del 25 de mayu, fecha defendida por dellos sectores al nun tener connotaciones relixoses. La pandemia provocada pol coronavirus SARS-CoV-2 traxo consigo munches restricciones que lleven a evitar grandes eventos, anque nun va torgar que’l pueblu asturianu pueda festexar la xornada.

Los actos oficiales del Gobiernu van reducise a un homenaxe a les persones sobrevivientes a la COVID-19 que va tener llugar mañana a les 18 hores nel uvieín Eurostars Hotel de la Reconquista. Adrián Barbón va presidir esti eventu con aforu reducíu y presencia de dalgunos enfermos que superaren la enfermedá.

La Ilesia asturiana va dar misa en Cuadonga como ye vezu, anque nesta ocasión nun va haber procesión cola imaxe de la Santina. L’arzobispu Jesús Sanz Montes va presidila na basílica, onde l’aforu va tar llendáu a poco más de 250 persones.

Asturies nun tien rei

La cara reivindicativa del Día de la Nación Asturiana va tar esti añu en Xixón, con mázcara y calteniendo la distancia interpersonal. Coleutivos soberanistes y republicanos que se vienen axuntando baxo’l lema ‘Asturies nun tien rei’ entamen una manifestación con salida a les 12.30 hores de L’Humedal baxo la conseña ‘soberanía y República’.

Andecha Astur, la Corriente Sindical d'Izquierda (CSI), Darréu, la Federación Asturiana Memoria y República (FAMYR), Anticapitalistes Asturies o’l Bloque Críticu Asturies son dalgunes de les organizaciones convocantes d’una cita que va finar nel llugar mui simbólicu, la plaza Institutu. Nesti llugar conocíu popularmente como El Parchís ta la ‘Casa Blanca’, edificiu que fora sede del Conseyu Soberanu d’Asturies y Lleón nel 1937.

Otra manera, dada la situación, nin Izquierda Xunida (IX) nin Podemos entamen actos políticos o folixes populares pa esti 8 de setiembre.

Contador Estadistiques