Día del Llibru Asturianu

Ún de Grao lleva la so propuesta musical a Lleón y Madrid

|
Ún de Grao lleva la so propuesta musical a Lleón y Madrid

José Martínez Álvarez va actuar primero en Xixón nel conciertu caberu d'esta edición del Ciclu de Folk de Cámara Ígor Medio xunto con Pepín de Muñalén y Tony Cruz.

Va ser una oportunidá nueva pa disfrutar de la propuesta d'Ún de Grao, que ta acabante d'espublizar el so segundu primer LP 'Pelo segao', col acompañamientu d'estos dos músicos. Asina'l moscón va tocar el so repertoriu basáu na tonada con Pepín de Muñalén al saxu y les xiblates, y Cruz al contrabaxu.

Esti conciertu, previstu pa mañana a les 19.30 hores con entrada de baldre, forma parte del Ciclu de Folk de Cámara Ígor Medio qu'entama cada dos años Juventudes Musicales de Gijón dientro de la iniciativa 'Los Conciertos del Museo' qu'acueye'l patiu del Muséu Casa Natal de Xovellanos. Enantes tocaron los tríos formaos por Leticia Baselgas, Elías García y Rubén Bada, y por Gonzalo Llao, Pedro Sanjurjo y Miguel Villar.

Xira pel Estáu

Tres esti ciclu n'alcordanza del que fora miembru de Felpeyu, Ún de Grao va facer una pequeña xira con paraes en Lleón y en Madrid. Na capital vecina va actuar el domingu a les 21.30 hores na Tabierna El Cuervo (La Sal, 6), chigre nel que repite depués de tocar l'añu pasáu.

El miércoles la cita va ser en Madrid, n'El Intruso (Augusto Figueroa 3), dientro del Slam Poetry nel que van recitar Paul Itfish y Antonio Díez a partir de les 21 hores. La entrada ye de 6 euros y inclúi consumición.

Esti amiestu de música y poesía va repetise'l sábadu, a la mesma hora, nel Alevosía (Andrés Borrego, 8), con entrada anticipada a 6 euros.

 

Contador Estadistiques