Un consorciu va apurrir servicios de tecnoloxíes de la información a los conceyos de menos de 20.000 habitantes

El presidente del Gobiernu asturianu Vicente Álvarez Areces presentó ayeri en Llanes el Consorciu Tecnolóxicu d'Asturies. Creau por un alcuerdu ente l'alministración autonómica y la Federación Asturiana de Conceyos (FACC), los servicios d'esti consorciu empobínense a los setenta conceyos asturianos de menos de 20.000 habitantes, entrando en funcionamientu ente últimos de xineru y primeros de febreru.

El Consorciu va apurrir servicios de tecnoloxíes de la información a estos conceyos pequeños nos que les nueves tecnoloxíes tá nun estáu de menor desarrollu que nes grandes ciudaes asturianes. Ente los servicios que va apurrir de mano, van tar la creación y mantenimientu de páxines web pa los conceyos, ello nun contestu en que 16 conceyos del país entovía nun tienen web. Otru de los servicios va ser el caltenimientu de les redes informátiques de los mesmos conceyos y la creación de servicios avanzaos, como la emisión de certificaos de padrón y reserves d'instalaciones por Internet. Tamién se quier qu'estos conceyos puean conectase cola Axencia Tributaria, la Tesorería Xeneral de la Seguridá Social y el Ministeriu del Interior pa que meyoren la so xestión y servicios a los ciudadanos.