Un congresu va traer a Asturies a los mayores espertos mundiales en bioconstrucción

Les más de les viviendes actuales son grandes consumidores y malgastadores d'enerxía y recursos naturales. Por ello y por cuenta'l creciente deterioru ambiental, ye necesario axuntar los criterios de comodidá y salú colos de respetu medioambiental. Ello pue facese siguiendo los criterios de la bioconstrucción, la construcción ecolóxica y la bioclimática, y avezando a la xente a aforrar y reciclar pa utilizar de mou racional y económicamente los recursos y materies primes. Esta ye la teoría básica de la que parte la bioconstrucción, que mira de facer edificios partiendo d'un conceptu global de respetu al mediu ambiente, dende l'aprovechamientu térmicu o de la lluz natural dientro de la vivienda hasta la posibilidá de recicláu de los materiales n'acabando'l ciclu de vida de la casa, too ello tirando de distintes disciplines y saberes como la xeobioloxía, l'urbanismu, la electromagnética o la bioclimática.

Esta disciplina de la bioconstrucción ye una desconocida n'Asturies, onde namás esisten unes poques cases a títulu particular llevantaes respetando los sos principios y ún edificiu públicu, el de la Empresa d'Agües de Xixón, qu'adopta dellos de los sos conceptos, sobremanera los que se refieren a la bioclimática. Precísamente'l responsable d'esti edificiu, l'arquitectu Diego Cabezudo, va ser ún de los participantes nes xornaes sobre bioconstrucción que van facese en Xixón del 7 al 9 d'ochobre y nes que va participar tamién el mayor espertu en tol estáu en bioconstrucción, l'arquitectu navarru Ismael Caballero. La fundación GEA ye la responsable de la organización d'estes xornaes en collaboración cola Fundación Municipal de Cultura de Xixón. Asturies.com ufiérta-yos a los sos llectores el programa, que pue descargase equí en formatu pdf.