Un colectivu de mayestros esixe l’apertura de les llistes d’asturianu en secundaria

Pesllada dende va cuatro años, la llista de mayestros d'asturianu en secundaria ta anguaño escosada, y yá nun queda naide por llamar de la mesma pa cubrir plaza nenguna. El procedimientu normal nestos casos ye'l d'abrir una llista nueva, pero Educación fizo una disposición transitoria cola que s'otorga autoridá pa llamar a docentes d'otres llistes. Un grupu de mayestros coles titulaciones precises pa dar asturianu pero que tan dando otres materies o bien en paro reclámen-y a la Conseyería l'apertura de la llista.


La bolsa d'interinos d'asturianu del añu 2000 ye'l documentu pol que se mandaba hasta agora la Conseyería d'Educación cuando precisaba de llamar a un mayestru pa cubrir una plaza d'asturianu, pero al entamu d'esti cursu 2004-2005, yá nun quedaba nadie por llamar ente les aprosimadamente 90 persones qu'iguaben esa llista. Cuando pasa esto mesmo en cualquier otra asignatura, lo normal ye que se convoque un plazu p'apuntase a una bolsa nueva d'interinos na que cada persona pue presentar los sos méritos y que se convierte automáticamente nun documentu públicu pol que se manda la Conseyería pa cubrir les necesidaes de personal que vayan creándose hasta la convocatoria d'unes oposiciones nueves. De fechu, esti mesmu cursu, esi procedimientu de creación de bolses nueves yá se dio dos vegaes, el 8 de payares del 2004 y dempués el 8 de marzu del 2005, afectando a los interinos que ponen asignatures como francés, alemán, llatín, bioloxía y otres munches especialidaes de secundaria, formación profesional y dellos cuerpos de mayestros.

Sicasí, l'asturianu, con tener la so llista escosada, nun recibió'l mesmu tratamientu qu'otres asignatures. Según denuncia un colectivu d'interinos que se punxo en contactu con Asturies.com pa dar a conocer el so casu, la Conseyería siguió otru métodu distintu cola llista d'asturianu. Según esti colectivu, que pel momentu quier guardar l'anonimatu hasta qu'escueyan un representante del grupu, yá'l 27 de xunetu del 2004, enantes d'entamar el cursu, la Dirección de Recursos Humanos del Principáu espublizó una resolución pola que s'aprebaben les instrucciones y procedimientos pa la ellaboración de llistes d'interinos. Nesta resolución amestábase una disposición adicional na que s'esplica que "pa cubrir les necesidaes que se xeneren en llingua tradicional bable/asturianu o gallego/asturianu los aspirantes habrán tar inscritos nel Rexistru de Capacitación y formar parte de cualquiera de les llistes de mayestros o de profesores, acordies col nivel educativu en que se dea la necesidá".

Gracies a esta disposición, según espliquen los interinos, la Conseyería sigue ensin abrir una bolsa nueva y llama a persones que tean apuntaes n'otres llistes con tal de que tengan la capacitación y tean daos d'alta nel rexistru de capacitación.

El colectivu d'interinos esplica qu'esto ye perfectamente llegal en cuantes qu'esiste un encontu pa ello na disposición adicional, pero tamién entienden que'l procedimientu ye escuru dafechu, al nun sabese por qué prioridaes se manda la Conseyería pa da-y la plaza a ún interín o a otru, pero amás esti colectivu d'interinos, que formen agora mesmo cerca de 25 persones, asegura qu'hai docentes ente los que se llamó esti añu que tan poniendo clase d'asturianu ensin tar en Rexistru de Capacitación. Les irregularidaes que detecten los interinos, y qu'afecten esclusivamente a l'asignatura d'asturianu, repítense a lo llargo de tol procesu de contratación, y asina ye que mientres pa otros materies lo normal ye qu'Educación faiga pública una convocatoria al traviés del so portal d'internet cada martes, nel casu del asturianu lo que se fai ye llamar por teléfonu a la persona que se quier contratar.

Los interinos afectaos qu'esixen l'apertura de la bolsa dicen que se punxeron en contactu con tolos sindicatos d'enseñanza pa denunciar el casu. Según espliquen, en toles centrales sindicales recibieron una rempuesta asemeyada consistente nel apoyu verbal y nel encamientu de que pel momentu llevaren l'asuntu a títulu personal, poniendo recursos individuales énte la conseyería d'Educación y la Dirección de Recursos Humanos, procedimientu nel que s'alcuentra agora esti grupu de docentes. Otramiente, miembros del colectivu tuvieron tamién una entrevista con responsables de la Dirección de Recursos Humanos, que-yos esplicaron que la bolsa d'interinos d'asturianu nun ye una "bolsa" propiamente dicha en cuantes que l'asignatura d'asturianu nun ta reconocida como una especialidá educativa, razón pola que se decidiría'l crear n’escosandose la llista del 2000 una "llista ficticia" que ye cola que se trabaya actualmente.

Ello nun contenta a esti grupu d'enseñantes que llamenten que la llingua asturiana siga siendo un "casu escepcional" nel sistema educativu asturianu sometida a disposiciones arbitraries y procedimientos que como mínimo, abulten "poco tresparentes" lo que lleva a una situación d'inestabilidá llaboral y namás pue facer qu'empeorar les condiciones del enseñu de l'asignatura.