Dibuxos, microrrellatos y poemes con mensaxes d'aliendu y solidaridá a la sociedá asturiana van poder presentase a esta iniciativa mientres la cuarentena.
La Conseyería de Cultura, Política Llingüística y Turismu, al traviés de la Direición Xeneral de Deporte, convoca esti certame cultural que complementa los Xuegos Deportivos Escolares y Xuegos de Deporte Adaptáu, anguaño suspendíos pol estáu d'alarma por cuenta la pandemia de coronavirus SARS-CoV-2. Ésti lleva'l nome de Xuegos Deportivos Escolares en Casa-Desafíu COVID-19 y ta destináu a les munches y munchos deportistes que nun pueden prauticar agora la so modalidá.
La temática de los trabayos presentaos ha de xirar alredor del deporte nel que ta inscritu cada escolín nos Xuegos, especificando la categoría na que compite, y facer referencia a "los valores rellacionaos col espíritu deportivu y d'equipu, la convivencia, l'esfuerciu y el respetu a les normes". Los trabayos han d'apurrise en formatu PDF o con una fotografía del dibuxu, microrrelatu o poema a la dirección de corréu dgdeportescovid-19@asturias.org.
La fecha llende de receición de los dibuxos, los microrrellatos o los poemes va ser l'últimu día del zarru. Mientres dure la cuarentena, los orixinales recibíos van dir escoyéndose y espublizándose al traviés de redes sociales y web del Gobiernu "como una bona práctica más de collaboración y interactuación qu'ayude a pasar estos momentos de manera activa, constructiva y llúdica".
Na semeya, final de los Xuegos Deportivos Escolares 2018-2019 de voleibol femenín en categoría cadete.
Adxuntu | Tamañu |
---|---|
![]() | 315.43 KB |