Un asturianu na corte del Rei Rainiero

La Fórmula 1, deporte d'élites onde los haya, celebra esti fin de selmana la carrera más esclusiva del añu. Lo más espurrío de la sociedá europea va pasar per Montecarlo pa ver los bólidos de colores de la Fórmula 1 peles cais de la ciudá ensin reparar en gastos. Un fin de selmana en Mónaco, yendo a lo probe, pue salir sobre los 5.000-6.000 euros, anque bien cierto ye que l'espectáculu ye únicu.

La velocidá cada añu mayor de los coches y la falta de seguranza de los circuitos urbanos foron desaniciando col tiempu a les carreres en ciudaes del almanaque deportivu, pero la esclusividá de la carrera qu'entama l'Automovil Club de Mónaco parez daqué intocable, colo que depués de más de cincuenta años de Fórmula 1, Mónaco ye la única carrera que sigue faciéndose peles cais de la ciudá, onde los monoplaces circulen a medies de velocidá de 140 km/h, bien lloñe de los 180 o 200 que dan n'otros circuitos más rápidos. Colos coches a bien pocos metros de distancia, l'espectador pue ver la cara de los pilotos pel cristal del cascu, y el ruiu de los motores, que tan tol tiempu cambiando de marcha, ye otru factor d'espectacularidá. Aparte de lentu, Mónaco ye estrencho y malo p'adelantar, polo que sacar un bon tiempu n'entrenos ye vital si se quier tar alantre en carrera, pero los entrenos nun son namás que l'entamu d'una elea pa pilotos y coches, que sufren enforma a lo llargo de dos hores de carrera pa poder cruciar la meta. Si la máquina acaba resintiéndose de los frenazos y cambeos de marcha, el pilotu, que suel acabar deshidratáu, nun pue perder la concentración nin un segundu si nun quier espetar el coche nes barreres de seguranza, al empar que tien de procurar averase lo más que pueda a elles pa facer los meyores tiempos.

Asina ye Mónaco, la carrera más especial del añu onde Fernando Alonso ta llamáu a facelo bien. Yá corriendo en categoríes inferiores, l'asturianu foi quien a remontar dende atrás nesti circuitu, lo que ye llabor de campeones, pero amás Mónaco ye un trazáu onde la potencia bruto del motor cuenta menos que'l valir del pilotu. La diferiencia de potencia ente Renault y Ferrari va contar menos qu'otres veces, y Alonso va poder xugar una baza importante peles cais de la especialísima corte de Rainiero