Un asturianu entra nel W3C

Xabiel G. Pañeda, profesor del área de telemática de la Universidá d'Uviéu, ye dende la otra selmana l'únicu representante d'una universidá española nel W3C, el consorciu internacional creáu pol padre d'internet Tim Berners Lee

El W3C ye un consorciu internacional nel que participen más de 400 empreses del sector informáticu que trabayen en comuña col oxetivu d'apautar es estándares de referencia pal web, estudiando los sistemes y llinguaxes pa la tresmisión de datos vía web y oficializando'l so usu per aciu de recomendaciones que tienen autoridá y validez a nivel mundial. El W3C, que creo ún de los padres de la internet, el premiu "Príncipe d'Asturies" Tim Berners Lee ye responsable de los estándares d'HTML, XML, SMIL, CSS y otros munchos más gracies a los qu'esti mediu y toles demás páxines que s'alcuentren pela rede puen lleese n'ordenadores de tol mundu. El Llaboratoriu de Ciencia de la Computación y Intelixencia Artificial del MIT (USA), el Consorciu Européu pa la Investigación n'Informática y Matemátiques (ERCIM), en Francia, y la Universidá de Keio nel Xapón son les entidaes que remanen la operación d'esti consorciu.

W3C abrió l'añu pasáu una oficina pa los países de fala castellana con sé n'Asturies, esactamente en Parque Tecnolóxicu de Xixón. Nel intre de poner esta oficina asturiana, el W3C recibió a delles empreses y instituciones del país como socies, ente elles Telecable, Sadim o la Universidá d'Uviéu.

Ello ye qu'agora, un investigador asturianu ta acabante d'entrar tamién nun de los grupos de trabayu más activos del W3C. Xabiel García Pañeda, profesor del área de telemática de la Universidá d'Uviéu ye miembru dende esta mesma selmana del grupu SYMM, que s'encarga d'apautar estándares pa la tresmisión de datos multimedia al traviés de la rede, tema nel que Pañeda ye un espertu, como demuestra'l fechu de que la so tesis doctoral, la primera que se presentó n'asturianu na facultá d'Inxeniería, tratare sobre estes cuestiones.