Un apueste pola renovación del monólogu

L'Asociación "H.a Xareos" va celebrar el 3 de marzu en Xixón el primer "Certame de monólogu modernu n'asturianu, una iniciativa cola que quier presentase en público esti nuevu colectivu y que pretende ser l'espeyu de la modernización del repertoriu y contestu del tradicional monólogu cómicu n'asturianu, del que van conocese los conteníos nes prósimes selmanes.

El certame de monólogu n'asturianu ye'l primer actu qu'organiza l'asociación "H.a Xareos" Esta sociedá fundada n'ohobre de 2004 por Inaciu Galán y Gonzáles y Benxa Pérez, va dedicase d'agora n'adelantre a la organización d'actos culturales y d'ociu, per encargu o como esti certame, per iniciativa propio. El so plantegamientu ye, según mos cuntaba Inaciu Galán 'organizar actos rellacionaos o non cola llingua y cultura asturianes, pero que tengan siempre como llingua vehicular l'asturianu"

El Certame de Monologos va celebrase na Sala Albéniz de Xixón, el día 3 de marzu. Les entraes, a namás 6 euros, tán yá a la venta en Xixón en Café Trisquel, El Barucu, Llibrería Paradiso, Alborá Llibros, Astur-King Disco-bar y Mavy's Pub. N'Uviéu tán a la venta en Chigre El Naranco y na sede de la Xunta Pola Defensa Llingua Asturiana (Llar Solidariu). Y n'Avilés les entraes tarán a la venta a lo llargo d'esta selmana na Llibreria Seronda. La empresa de creatividá testil publicitaria Publigrafik y Les Noticies patrocinen esta iniciativa que cuenta tamién cola collaboración d'Asturies.com, Televisión Local Xixón (TLG), Xunta Pola Defensa de la Llingua y la Oficina Municipal de la Llingua de Xixón.