Un Acesol Voley fundíu vuelve a perder

Nun partíu nel que yá nun se xugaba ná pal Acesol Voley tres de confirmase'l descensu la selmana pasada en Las Palmas el resultáu foi una nueva derrota pal conxuntu fabril, esta vegada contra l'Alvameca Excentric Agüere.


La superioridá foi absoluta pal cuadru d'Ambrosio González, un conxuntu que yá llograre la clasificación pa los "play-off" pol títulu y que ta na octava posición empatáu col Caja de Ávila y a una victoria del sestu clasificáu, l´Universidad de Burgos.

El primer set tuvo marcáu pol parcial d´entamu, favoratible al conxuntu canariu de 0-5, pasando de 1-1 a 1-6 gracies al aciertu de Priscila Muñoz y al saque de la brasileña Soraya Santos. Esto fizo que Roberto Furgoni pidiese tiempu muertu pa intentar parar al equipu canariu. Valentina Burdacheva, que xugare enantes nel Acesol Voley y nel Universidá d´Uviéu Campus Xixón, mantuvo la diferencia con dos aiciones consecutives (3-9), llogrando Bárbara Rodríguez el primer puntu local (4-9), pues los trés primeros fueren errores de les visitantes. L'Acesol averóse nel marcador gracies a Daniela da Silva (9-13), pero la reacción canaria, con un parcial de 0-3, dexó' resultáu nun 9-16, llegándose al final con un 16-25.

El segundu set entamó con un error nel saque de la central brasileña Fabiana Aguiar, que foi la primera ventaya xixonesa nun set. Otru erru de Soraya Santos, xunto con un saque direutu de Janesca Scharnovski (4-2) fizo qu´Ambrosio González pidiere tiempu muertu, que foi efeutivu al voltiar el marcador (4-5). L'Alvameca Excentric abrió furacu con un parcial de 0-4, pasando de 8-9 a 8-13, con Soraya y Yazmina Hernández como pegoyos del equipu. Nesta parte del set hai de destacar l'aciertu ofensivu de la xugadora local Bárbara Rodríguez con cuatro aiciones positives pa ella, dexando la diferencia en trés puntos (13-16), pero nuevamente un decisivu parcial foriatu de 0-5, punxo`l marcador en 13-21, pa finar con un 14-25, dempués d´un error nel remate de Vita Prychepa.

El tercer set emprimó con una salida insular mui fuerte y un parcial de 0-5, con Soraya Santos nuevamente como elementu fundamental nel ataque, mientres que namás Vita y Bárbara anotaben pal Acesol. Con 5-9, otru parcial de 0-5 punxo un resultáu de 5-14, con aiciones decisives de Fabiane Aguiar. Nesta parte del periodu prodúxose un interesante duelu ente compatriotes, siendo les protagonistes les ucranianes Vita Prychepa y Valentina Burdacheva, pero'l set foi favoratible a les canaries por 16-25, con un últimu remate fuera d´Estefanía Sangiao. Per parte local la meyor xugadora foi una vez más Vita Prychepa xunto con Daniela da Silva y Bárbara Rodríguez.

Nel Alvameca Excentric Agüere destacar a Soraya Santos, meyor xugadora del alcuentru, tamién tuvieron a bon nivel Yazmina Hernández y Valentina Burdacheva.