Un 55 por cientu de los llectores d’Asturies.com ve bien el zarru de les térmiques por contaminantes

|
Un 55 por cientu de los llectores d’Asturies.com ve bien el zarru de les térmiques por contaminantes

La contaminación que provoquen les centrales térmiques nun país tan afeutáu por esti problema como Asturies pesa más que la perda de puestos de trabayu pa los usuarios d’Asturies.com que participaron nel nuesu ‘Conceyu Abiertu’. Un 55 por cientu de los llectores cree que deberíen zarrase esti tipu d'instalaciones.

L’alderique sobre’l pieslle de les térmiques tres l’aprobación nel Congresu d’una iniciativa qu’instaba al Gobiernu a zarrales nel 2020, esto ye 30 años enantes de lo que marca la Xunión Europea, gracies a los votos de Xuníos Podemos, PSOE, Ciudadanos y UPN, ente otros grupos, y la oposición de Foro, el PP y Coalición Canaria, amás de la polémica decisión d’Iberdrola de poner fin a l’actividá de Lada, llevónos a entrugar nesta ocasión a los nuesos llectores sobre esta cuestión: ¿Deberíen piesllase les centrales térmiques n’Asturies? Un 55 por cientu optó pola respuesta ‘Sí, son mui contaminantes y el país tien unes cifres esmolecientes nesi sen’, mentes qu’un 45 por cientu señaló que ‘Non, suponen munchos puestos de trabayu’.

La decisión del Congresu xeneró numberoses critiques ente sindicatos, el Gobiernu y la FSA, qu’obligó al grupu socialista a matizar los motivos del so votu. Izquierda Xunida tamién pidió esplicaciones a Madrid, yá que Xuníos Podemos foi’l partíu que presentó la iniciativa. Podemos, pela so parte, señaló que nun se votó’l zarru de les térmiques nel 2020, sinón el fin de los pagos por capacidá a les centrales qu’emitan más de 550 gramos de dióxidu de carbonu por quilovatiu/hora, lo que según delles opiniones fadríales inviables.

Dende esti momentu yá ye posible participar nun ‘Conceyu Abiertu’ nuevu. Nesta ocasión prestaríanos conocer la opinión de los nuesos usuarios sobre si habrá alcuerdu pa sacar alantre los presupuestos del 2018 o si Asturies encamínase hacia una prórroga presupuestaria.

Na semeya, la central térmica de Lada. Semeya obra de B25es baxo llicencia CC BY-SA 3.0.

Contador Estadistiques