Un 45 por cientu de los llectores d’Asturies.com, desencantaos de cara al Día de la Nación Asturiana

Casi la metá de los usuarios d’Asturies.com considera que nun hai nada que celebrar nel Día de la Nación Asturiana. La situación que vive’l país lleva a una bona parte de los nuesos llectores a desencantase énte esta xornada.

El porcentaxe total de la xente qu’escoyó nel nuesu ‘Conceyu Abiertu’ la opción ‘Nun hai nada que celebrar’ foi del 45 por cientu, por un 36 por cientu que dixo que va participar en dalgún de los actos políticos entamaos polos partíos asturianistes. Mentes, un 16 por cientu va aprovechar la xornada pa pasala en familia o na playa y namái un 2 por cientu tien previsto disfrutar de les actividaes entamaes pol Gobiernu en Tinéu.