Un 38 por cientu de los llectores d’Asturies.com apoyen la fuelga de futbolistes profesionales

|

La fuelga de futbolistes qu’impidió la celebración de la primer xornada de Lliga en Primera y Segunda División tien el sofitu del 38 por cientu de los nuesos llectores. Mentes, el 18 por cientu amosó tar en contra del paru en ‘Conceyu Abiertu’.
 
‘Ye una midida correuta y positiva pal fútbol. Dalgunos clubes fichen y nun paguen, y eso ye adulterar la competición’ foi la opción qu’escoyó’l 38 por cientu de los nuesos usuarios, mentes que’l 18 por cientu votó por ‘Ye una falta de respetu a los aficionaos. Coles perres que ganen, los futbolistes nun deberíen dir a la fuelga’. Sicasí, la mayor parte de los llectores d’Asturies.com, un 45 por cientu, señaló que nun-yos prestaba’l fútbol y, poro, daba-yos igual que la Lliga de fútbol parare o non.
 
Mentes, güei celébrase la sesta reunión ente l’Asociación de Futbolistas Españoles (AFE) y la Liga de Fútbol Profesional (LFP) cola intención de llegar a un alcuerdu pa qu’esta fin de selmana se dispute la segunda xornada de Lliga, na que’l Sporting recibe a la Real Sociedad n’El Molinón el sábadu a les 18 hores. Nel casu de nun llegar a un alcuerdu nesti aconceyamientu, la suspensión de la xornada sería casi un fechu. Los futbolistes siguen demandando un fondu de garantía salarial suficiente pa cubrir les deudes de los clubes con los futbolistes, que superen los 50 millones d’euros.
 
Otra manera, yá ta disponible otru ‘Conceyu Abiertu’ nel que los nuesos llectores pueden dar la so opinión. La entruga d’esta selmana plantega la cuestión de la posibilidá de llevar la ‘AS’ na matrícula de los vehículos. En Catalunya, el Parlament va debatir la inclusión del ‘CAT’.

Contador Estadistiques