Últimos díes pa inscribise al IV 'Xixón Fala en 3'

El concursu va celebrase'l sábadu 17 de setiembre nel salón d'actos del Antiguu Institutu.

El 5 de setiembre a les 00.00 hores fina'l plazu pa inscribise nel IV 'Xixón Fala en 3', el concursu entamáu pol Conceyu de Xixón que busca fomentar l’emplegu del asturianu pa tratar cualquier tipu de temática. Los participantes han presentar un tema, una idea, una investigación, un proyeutu, un problema social, etc., “con munchu procuru y cola mayor calidá llingüística posible énte un públicu non especializao, xeneralista y variao”, pa lo que cuenten con 3 minutos de tiempu xustos, lo qu’eleva la dificultá de la esposición, “d’una manera clara y concisa” y con “un rexistru cultu”.

Les trés estayes del concursu son cultura y tradición asturiana, nel que tratar temes d’antropoloxía, toponimia, baille, historia o sociollingüística, ente otros; de divulgación xeneral; y el de mocedá, destinada pa persones de 14 a 18 años, que pueden tocar cualquier temática. El ganador de caún d’elles va recibir 600 euros, mentes que los segundos lleven 275 y los terceros, 125.

El ‘Xixón Fala en 3’ va celebrase’l día 17 a les 11 hores nel Antiguu Institutu. El xuráu va valorar tanto la calidá espositiva y la capacidá de síntesis como la calidá llingüística, la oratoria y la capacidá de comunicación de les persones participantes.

Los ganadores na edición anterior, celebrada en febreru del 2021, foron Arantza Margolles, na estaya de cultura y realidá asturiana, con ‘Superstición y malos vezos relixosos. La Inquisición n’Asturies nel casu de Pedro Alonso’; Xandru Armesto, na de divulgación, con ‘Actuaciones educatives d’éxitu’; y Alma Hidalgo, na de mocedá, con ‘Lorca, sangre asturiana’.