Ufiertes de trabayu nos servicios llingüísticos de los conceyos

Mientres s'escosa'l plazu pa presentase a la plaza que convoca'l Serviciu de Normalización del Cabu Peñes, l'Ayuntamientu de Xixón ta acabante de convocar una plaza d'Auxiliar Alministrativu pa complementar la dotación de la oficina municipal de la llingua.
Los servicios de normalización del conceyu de Xixón y del Cabu Peñes faen estos díes convocatoria de dos places temporales al traviés de les correspondientes ufiertes públiques.

D'una parte, l'acabante crear serviciu de normalización de la mancomunidá del Cabu Peñes, qu'axunta a los conceyos de Carreño y Gozón, precisa d'una persona que faiga'l llabor de coordinación d'esti serviciu y que s'encargue tamién de los llabores de traducción de testos que precise'l conceyu. Nesti sentíu, toles prebes que s'especifiquen na convocatoria que van tener que pasar los aspirantes busque claramente un perfil especializáu en cuestiones de normalización. Con 21 hores selmanales de xornada llaboral, el responsable de política llingüística de la mancomunidá va tener contratu hasta'l 31 d'avientu, qu'acaba la partida presupuestaria destinada pa esti puestu, anque les bases falen d'una posible prórroga.

El plazu pa presentar tola documentación precisa pa esta plaza nel Cabu peñes remata esti miércoles día 30 de xunu, mientres que la segunda plaza temporal a concursu, convocada pol Conceyu de Xixón, tien abiertu'l plazu pa presentase hasta'l día 6 de xunetu. Nesti casu, l'Ayuntamientu de Xixón busca un perfil distintu, menos especializáu en cuestiones llingüístiques y más alministrativu, pa complementar la dotación d'una oficina municipal na qu'anguaño trabayen la responsable del serviciu, María Xosé Rodríguez, y un becariu.

Dende esti enllaz al BOPA puen descargase tolos requisitos pa la plaza del Cabu Peñes, mientres que l'Ayuntamientu de Xixón tien colgada la so convocatoria na web nesti documentu PDF