La UABRA encara la segunda selmana d'actividá

Tres el descansu de la fin de selmana, la Universidá Asturiana de Branu (UABRA) encara la segunda selmana d'actividá. Esti llunes principia un cursu nuevu y continúen l'elemental y l'avanzáu.

‘Cantares, bailles ya instrumentos musicales asturianos’, a cargu de José Antonio Gómez, ye'l cursu de 'Afondamientu Cultural y Llingüísticu' que va desenvolvese esta selmana. Ésti afonda nel conocimientu de los cantares, bailles ya instrumentos populares asturianos dende la perspeutiva de la so presencia na escuela. D'esti mou, trata aspeutos de la presencia de bailles, cantares y instrumentos na cultura tradicional y les fiestes populares, siempre col enclín d'amosar el so valir educativo.

De manera paralela a la UABRA, continúa abierta al públicu la esposición 'Sable. Una revolada pelos arenales d’Asturies' na sala d’esposiciones de la Casa de Cultura de Cangas del Narcea. Tamién tán previstos dos conferencies nueves, 'La esperiencia del emplegu de la llingua asturiana nos informativos de la RPA', a cargu de Naciu Varillas (mañana); y 'Polítiques sociales de dignificación del asturianu. Iniciatives a curtiu y mediu plazu', a cargu d'Ana Fueyo (xueves), dambes a les 19 hores nel salón d'actos de la Escuela-Hogar, asina como la proyeición del llargumetraxe Bernabé'l miércoles, a les 22 hores, nel Teatru Toreno.