¿Ú los profesionales de la tv?

Cola futura TV autonómica en puertes, el negociu del audiovisual lleva tola traza de dir a convertise nun sector bien dinámicu n'Asturies. Lo mesmo la canal pública que les empreses nueves del audiovisual que se supón que van dir saliendo alredor del'autonómica van precisar de profesionales que permitan echales a andar, lo que pue suponer una interesante bolsa de puestos de trabayu d'equí a la vuelta d'unos años. La Universidá d'Uviéu, que lleva años cola intención de poner una titulación propio n'audiovisuales, entovía nun tien avanzao nada nesti área de conocimientu, colo que les úniques posibilidaes formatives queden en manes d'academies particulares o de cursos públicos pa xente en paro, como ye'l casu que nos ocupa.

Ello ye que tolos años l'INEM entama cursos pa xente en paro en formación de técnicu n'audiovisuales. Los cursos, de más de 500 hores que, con módulos específicos de cámara de vídeo,grabación, tratamientu y reproducción ente otros, dan una formación bien curiosa pa postular a cualquier puestu de trabayu o pa incluso pa ponese por cuenta propio. Si l'añu pasáu el cursu tuvo llugar en conceyu Llanera, nesta edición del 2.003 va ser Xixón la sede d'esti cursu que s'empobina a mayores de 16 años.

Sicasí, bien por falta de propaganda o porque'l públicu potencial nun ve les posibles salides de formase nesta especialidá, les más de les quince places del cursu siguen ensin cubrise a día de güei, colo que ye posible apuntase anque'l plazu oficial tea escosáu. El cursu entama'l mes qu'entra y dura hasta ochobre, y pa más información hai qu'entrugar na Fundación Municipal de Cultura del Ayuntamientu de Xixón, que va llevar la organización del cursu, o pasar peles oficines del INEM.