¿Ú la dinamita?

Dicía'l filósofu alemán Nietzsche qu'al mundu de la verdá nun pue llegar el común de los mortales y que namás tienen promesa d'acceder a elli'l sabiu, el piadosu, el virtuosu y el penitente. Suponse que los medios de comunicación tenemos el papel d'acercá-yos esi mundu verdaderu a los nuestros llectores, pero bien ye verdá qu'alguna d'estes característiques de sabiduriá y virtú ha tener quien quiera interpretar lo qu'asocedió esti fin de selmana ente unos rapazos navarros y la Guardia Civil lleendo la información que presenten dos de les principales cabeceres de prensa d'Asturies cuando informen sobre un estrañu socesu qu'ocurrió esti fin de selmana a altes hores de la nueche del sábadu en Cangas del Narcea y nel que se vieron envueltos un garapiellu de mozos de Navarra, un ciudadanu anónimu y la Guardia Civil.

D'atender a la versión qu'espubliza'l diariu La Nueva España, un grupu de persones del entornu d'ETA con antecedentes demostraos por pertenencia a Jarrai entraron de madrugada nun chigre de Cangas entrugando n'Euskera onde podía mercase dinamita o quien lo vendía. La versión d'otra cabecera histórica del periodismu asturianu, la voz de Asturias, presenta'l socesu como un malentendíu ente un veceru del chigre y un garapiellu d'escursionistes que, baxo la influyencia del alcohol, empezaron preguntá-yos en broma onde podía mercase'l famosu explosivu a los demás veceros del chigre. Dambes versiones concueyen nuna cosa: dalguien que taba en chigre llamó alarmáu al 112, apaeciendo darréu nel local un grupu d'axentes de la Guardia Civil, que procedieron al interrogatoriu de los visitantes navarros.