Tuña entama otra vuelta la so nueite folk

La localidá de Tuña nel conceyu de Tinéu repite la bona esperiencia del añu pasáu, y vuelve a acoyer una nueche folk. Amás de la música de los grupos folk el día 2 de xunetu, hai toa una riestra d'actividaes paraleles que paga'l tiru comentar.

Nel conceyu de Tinéu, concretamente nel llugar de Tuña, quedaron contentos cola esperiencia del añu pasáu, y anguaño nun lo pensaron dos veces pa entamar la II Nueite Folk de Tuña. Esta iniciativa nun solo va centrase na cuestión folixera, sin non que tamién tien programaes otres propuestes. A partir del 26 de xunu va tar abierta una esposición na Ilesia de Tuña onde va poder vese indumentaria tradicional recoyida per toa Asturies, onde va haber hasta traxes de va 200 años aproximadamente. Tamién vamos poder ver nesta amuesa 5 ramos, el Ramu de Trascastro, el de Velas, el de Culubreiro, el de San Pedro de Tinéu, y el del Oriente. Amás va haber tamién un esposición de madreñes de toa Asturies que van amosar perfechamente la evolución y diferencies de les mesmes a lo llargo del tiempu y l'espaciu.

El día dos de xunetu va ser el día grande cola esperada Nueite folk. Pero pa llegar a la nueche hai tien qu'haber un día, y Tuña quier que tamién seya parte de la fiesta. Dende les doce la mañana va haber un mercáu d'artesanos con música na cai. Pela tarde, a eso de les cuatro, van desfilar gaites gallegues y asturianes xunta panderos de los dos países. Los participantes nel desfile van ser Banda de gaitas Os xeitosos de Trazo (santiago de Compostela), Grupo de gaitas Axouxere, Melide (A Coruña), Banda de gaitas de Tinéu, Grupu d'investigación folclórica Sulabarda de Tinéu, Grupo de baile Os xeitosos de Trazo, Pandereteiras de Os xeitosos de Trazo y Pandereteres de Tinéu.

Más tarde, cuanto ya tea atapeciendo, va ser la hora de que los cuenta cuentos, sobre les 20:00 hores, entretengan a los grandes y a los pequeños, enantes de qu'eche andar la música nel escenariu. Cosa que va ser sobre les 22:30, cuando entame a tocar La Bandina'l Tombo, grupu que mui queríu per esta parte d'Asturies, y que de xuru que van ser quién a poner a la xente a baillar namás empezar. Darréu de los del Tombo, van tocar Corquiéu, col discu nuevu con ganes de xubise a un escenariu y enseñase en directo. La nueche va acabar cola actuación de la orquestina folk, que ye como a ellos-yos presta llamase a Los Ciquitrinos.

Dende la organización de quieren convidar a tol mundu a que s'acerque hasta Tuña, animando a trayer los instrumentos musicales y recordando qu'hai una zona d'acampada llibre pa posar dempués de la folixa.