Tsipras torna a ganar les eleiciones griegues

SYRIZA pierde cuatro escaños y pue repetir coalición de Gobiernu con ANEL.

Con una participación del 56 por cientu, Alexis Tsipras repite trunfu nes eleiciones griegues nueve meses depués de la convocatoria última. SYRIZA algamó'l 35,46 por cientu de los votos, pol 36,34 por cientu de xineru, algamando una victoria más amplia que les qu'avanzaben les encuestes. El númberu d'escaños de la formación izquierdista ye de 145, a seis de la mayoría absoluta.

Tsipras podría repetir coalición ANEL, que pasa de 13 a 10 escaños. Nueva Democracia, principal fuercia de la oposición, mentes, pierde un escañu p'algamar 75 pese a sumar un mayor porcentaxe de votos: un 28,10 por cientu por un 27,81 en xineru. La formación neonazi Amanecer Dorado conviértese na tercer fuercia política griega al sumar un escañu más (18) y casi un 7 por cientu de los votos.