Trunfu fácil pal Farho Xixón Baloncestu

El Farho Xixón Baloncestu ganó con gran facilidá, por 79 a 54, a un equipu que foi mui inferior y qu'en nengún momentu-y creo problemes, pues l'equipu xixonés siempres foi per delantre nel marcador. L´Algeciras Cepsa, con xugadores de gran nome nesta lliga, foi un conxuntu totalmente perdíu, ensin intensidá, ensin idegues, ensin rebote (el Farho Xixón garró-y 37 por 26 d´ellos) y ensin tiru (con cero en triples d´once intentos y con un porcentaxe de tiru del 31%).


Nel primer cuartu los fallos nel tiru, sobre too del Algeciras Cepsa, foron ún de los aspeutos más destacaos, asina como la másima ventaya de 9 puntos que garró`l Farho Xixón nesti cuartu. Exemplu d´esa falta d´aciertu ye que l´equipu andaluz entró nel caberu minutu namás que con 6 puntos, toos ellos de Doblas, anque llogró un pequeñu maquillaxe col resultáu de17-10.


El Farho Xixón apretó l´acelerador nel segundu cuartu y foi despegándose nel lletrónicu con diferencies cada vegada más grandes, primero de 15 puntos, dempués de 24 puntos y pa finar el cuartu de 21 puntos. L´entrenador de los andaluces intentólo coles rotaciones y poniendo un conxuntu más altu, pero nin asina, pues nun paró a los xixoneses na anotación nin nel rebote. Asina Tobalina quitó a Young y punxo a Saúl Blanco, pasando a ser los xugadores interiores Lledó y Waleskoswki, llogrando un ataque y una defensa más ceo. Salió-y bien al entrenador asturianu y l'equipu pegó un rebalgu poniéndose 24 puntos penriba nel marcador. Estos foron los meyores momentos del partíu y del equipu xixonés.


Nel tercer cuartu`l Farho Xixón dedicóse a mantener la ventaya y nel Algeciras Cepsa apaeció Ward, que fizo nesti cuartu 8 puntos. Nesti periodu tamién hai de destacar un gran mate fechu por Saú Blanco qu'agradeció muncho'l públicu.

Na última estaya del partíu, l´últimu cuartu, l´Algeciras Cepsa púnxose en zona pa intentar maquillar un poco`l resutáu y nun primer momento llogrólo con un parcial de 0-9, a 7 minutos pa finar, con un marcador de 64-48, pero, un triple de Vallmajó y con xugadores esteriores na pista, el Farho Xixón punxo tierra pel medio y un parcial local de 6-0 llevaron les coses otra vegada al so sitiu, llegándose al final con una diferencia de 25 puntos.


Destacaron nel Farho Xixón Keith Waleskowski (15 puntos, 17 rebotes y 3 tapones), Xavi Vallmajó (13 puntos, 6 asistencies), Pacreu y Saúl Blanco. Nel Algeciras Cepsa destacar a Hakeem Ward (18 puntos y 11 rebotes) y a Ricardo Guillén (11 puntos y 9 rebotes).


Alliniaciones:
Farho Xixón Baloncestu: Xavi Valmajó (13), Chus Poves (5), Saúl Blanco (10), Keith Waleskowski (15) y Tim Young (8). Tamién xugaron: Josep Ortega (5), Rubén Suárez (3), Jorge Lledó (8), Josep Pacreu (10), Javier Candás y Dani González (2).

Algeciras Cepsa: Ernesto Serrano (4), Juanma Ruiz (6), , Hakeem Ward (18), Javier Bulfoni (3) y David Doblas (6). Tamién xugaron: Matias Ibarra (2), Ricardo Guillén (12), David Mesa y Anthony Stacey (3).


Árbitrios: los señores Ángel de Lucas y Juan Pedro Morales. Elimináu por cinco personales Hakeem Ward (minutu 36).El Farho Xixón Baloncestu nun tuvo eliminaos. Unes dos mil persones nel Palacio los Deportes de la Guía en Xixón.

Parciales per cuartos: 17-10, 25-11, 18-15 y 19-18.