Trunfu ensin historia pal Sporting

El Sporting ganó pela mínima a un Poli Ejido que foi de los equipos más ramplones que pasaron anguaño per El Molinón gracies a un tantu de Pablo Lago que vieno dempués de que tolos puntes del equipu asturianu fallaren ocasiones bastante clares de gol.

Contra un Poli Ejido que llegaba empatáu a puntos na tabla col Sporting, l'equipu de Marcelino desarrolló un partíu tristayu marcáu polos errores y una falta de definición desesperantes que llegaron a enfadar al públicu en dellos momentos. Con too y con ello, l'equipu asturianu, qu'acusa la falta d'oxetivos asitiáu a once puntos del ascensu y l'ausencia de Samuel, tuvo bien d'oportunidaes contra un rival que nun fizo nada nos noventa minutos de partíu. Pablo Álvarez tuvo la primer ocasión clara pa marcar a los nueve minutos gracies a un pase de Calandria, pero un defensa local consiguió sacar la pelota cuando yá se colaba na portería. Calandria, Ismael y Biagini, cuando salió nel segundu tiempu, disfrutaron tamién d'ocasiones que nun supieron aprovechar, siendo clares sobremanera les de Biagini, que falló dempués de marchar por velocidá y ponese solu delantre del porteru visitante, y la de Calandria, que tampoco supo aprovechar dende'l testeru del área un pase que-y diere de tacón Ismael.

Pola contra, el Poli Ejido, que nun apaeció nel primer tiempu, esconsoñó nel segundu y tuvo un par de xugaes de peligru que nun foi a concretar, anque una d'elles remató con un gran barullu nel área sportinguista nel que pudo pasar cualquier cosa y que rescampló la falta d'aciertu de tolos futbolistes ayeri. Recibíu'l mensaxe del públicu, que protestaba pola falta de rixu del equipu, Marcelino fizo los cambeos que tocaben y dio-yos entrada a Biagini, Bauzá y Pablo Lago, que revolvieron al Sporting lo xusto pa quitase d'enriba a un rival qu'entamaba a dar sensación de peligru. Foi precisamente Pablo Lago'l qu'aprovechó un centru de pablo Álvarez pa poner, a once del final, el gol que-y daba'l trunfu al Sporting. Tres d'ello, el Sporting protagonizó una xugada emocionante con hasta cinco remates seguíos sobre la portería del Poli, pero que quedó ensin premiu.