Trunfu del Farho Xixón Baloncestu nuna gran segunda parte

El Farho Xixón Baloncestu nuna gran segunda parte llogró llevantar un partíu en Tarragona que nel descansu perdía por nueve puntos, con un resultáu de 32-23. Esta victoria tien más méritu al llograse delantre d´un rival direutu pa metese nes places de play-off d'ascensu, al que dexa a dos victories, y dempués d´una selmana na que l'equipu xixonés tuvo delles baxes por mancadures y enfermedaes de dalgunos xugadores importantes como Antxon Iturbe, que nun viaxo a Valls, Chus Poves, ensin entrenar tola selmana por tar malu del gripe, y Josep Ortega tamién mancáu y con molesties. Amás l'equipu xixonés gana'l basket-average particular col equipu catalán, que ganare en Xixón pol resutáu de 74-81 na cuarta xornada n'ochobre pasáu.

El partíu entamó con un primer cuartu igualáu, nel que nengún de los dos equipos destacó, y con un resultáu de 18-14 favoratible al Valls. Nel segundu cuartu l'equipu catalán despegóse nel marcador y el Farho Xixón Baloncestu tuvo permal, asina namás que llogró nueve puntos. Nesta primer parte del partíu hai de destacar la falta d'anotación del equipu xixonés.

Tres del descansu`l Farho Xixón Baloncestu entamó la remontada, llegando al pieslle del tercer cuartu un puntu perbaxo del Valls, 46-45. Nesti periodu destacó'l llabor de Keith Waleskowski con 19 puntos y de Jorge Lledó qu'anotó 9 puntos.

Nel caberu cuartu'l equipu xixonés pasó penriba del Valls, anotando 35 puntos y xurdiendo la figura de Chus Poves, pues l'estremeñu anotó 13 puntos dempués d'una selmana na que cuasi nun entrenó pol gripe.El meyor xugador del partíu foi'l norteamericanu del Farho Xixón Baloncestu Keith Waleskowski, qu'anotó 19 puntos, garró 22 rebotes, 19 d'ellos en defensa,y foi'l MVP de la xornada na LEB con 38 puntos de valoración. Tamién hai de destacar a Chus Poves (16 puntos), Jorge Lledó (12 puntos) y Xavi Vallmajó (15 puntos y 3 asistencies).

Nel Valls destacaron Shalawn Millar (24 puntos y 8 rebotes), Derrick Bryant (13 puntos) y Maurice Evans (10 puntos). Ente estos trés xugadores llograron el 67% de los puntos del so equipu.

Alliniaciones:

C. B. Valls Félix Hotel: Pedro Santos Lourenço (3), Derrick Bryant (13), Tim Kennedy (3), Anthony Evans (10), Shalawn Miller (24). Tamién xugaron: Albert Ros (4), Alex Ros (3), Jordi Tombas (3), Marc Silva (2) y José Juan Miguel (5).

Farho Xixón Baloncestu: Jordi Vallmajó (15), Josep Pacreu (3), Jorge Lledó (12), Keith Waleskowski (19), Tim Young (9). Tamién xugaron: Josep Ortega (2), Chus Poves (16), Saúl Blanco (4) y Rubén Suárez.

Parciales per cuartos: 18-14; 14-9; 14-22; 24-35.
Arbitraron el partíu los señores Juan Manuel Uruñuela y Marc Tortella. Por cinco faltes personales quedó elimináu'l xugador local Pedro Santos Lourenço.